Kalaallit danskillu aningaasat agguaannissaannut isumaqatigiilluarput

Nunatsinni aatsitassarsiornermi isertitat qanoq agguaanneqarnissaannik siunnersuut nutaaq kalaallit danskillu isumaqatigiinniartuinit tigulluarneqarpoq.

Suleqatigiissitat siulittaasuata Frank Jensenip ualimut naaperiarfissatut siunnersuut saqqummiuppaa, taannalu illuatungeriinnit ilassilluarneqarpoq. Taama nutaarsiassaqartitsivimmut Ritzau-imut oqarpoq folketingimut ilaasortaq Kresten Touborg.

Frank Jensenip siunnersuutaa nutaaq naapertorlugu nunatta ataatsimoortumik tapiissutit ukiumut 3 milliardit missaanniittut pisassavai. Uuliamik imaluunniit aatsitassarsiornermik allamik ingerlatsisoqalerpat, taava taakkunannga isertitat tapiissutinut ataatsimoortunut ilanngaatigineqartassapput. Qanorpiaq naatsorsuisoqartassanersoq Kresten Touborgip iserfiginngilaa. – Kisianni aaqqiissutissamik nassaarnissaq isumalluarfigisorujussuuara, Ritzau-imut oqarpoq.

Namminersorneq pillugu ataatsimiititaliarsuup siulittaasua Jonathan Motzfeldt ullumi siusinnerusukkut oqarpoq oqaloqatigiinnerit naammagisimaarini:

- Uuliamik nassaartoqassagaluarpat qanoq iliussanerluta oqaloqatigiissutigaarput. Kisianni massakkorpiaq naammassillugu suliarisinnaanngilarput. Suleqatigiissitami ammasumik oqallippugut aaqqiissutissamillu isumatusaartumik saqqummiussissaqqaarpugut, Jonathan Motzfeldt ullumi siusinnersukkut oqarpoq.

Suleqatigiissitat Frank Jensenip siunnersuutaa oqaluuserissavaat, Namminersorneq pillugu Ataatsimiititaliarsuup tullianik, apriilip 18-anni ataatsimiilinnginnerani.