Kalaallit Dansk Folkepartimit mianersoqquneqarput
Taamatut sioorasaaruteqarneq pivoq, Folketingimi attaviitsunngoqqammersup Pia Christmas-Møllerip siunnersuutaa ilaqutariit Danmarkimut qimaasutut akuerineqarnissaminnik qinnuteqartut, qimaasunut inissiisarfiit avataanni najugaqarsinnaanissaannut akuerineqarsinnaanissaat Siumup ilaasortaatitaata Lars-Emil Johansenip aamma Inuit Ataqatigiit ilaasortaatitaata Juliane Henningsenip taperserniarlugu aalajangermata.
Dansk Folkepartiip Folketingimi ilaasortaatitaannut siulittaasup Kristian Thulesen Dahlip pineqartumut oqaatsini sakkukillisillugit ima oqaatigai:
- Tamanna iliuuseriniagaasa kingunerisinnaasaannik inussiarnersumik eqqaasitsineruvoq. Annilaanngatigisinnaavara, Kalaallit Nunaanni inoqassasoq Danmarkimi naalakkersuisunut aamma Dansk Folkepartiimut ima kamassimatigisunik, allaat – aamma partiiminni isummiussat avaqqullugit – Danmarkimi naalakkersuisunut itigartitseqataassagunik ajornartorsiutiginaviarnagu.
Taakkua ilisimasariaqarpaat, Kalaallit Nunaanni pissutsinut akuliunnaveersaarnerup oqimaaqatigiinnera innarleramikku. Taamatut oqimaaqatigiinnerup allanngortinneqarnera akisoorujussuanngorsinnaavoq, Kristian Thulesen Dahl oqarpoq.
