Kalaallit Danmarkimiittut imminnut tatiginerat appasippoq

Inuttut naleqassusermik misigineq imminullu tatigineq kalaallit Danmarkimi najugaqartut akornanni appasissorujussuuvoq. Tamanna pissuteqarpoq kalaallinut isiginninneq qallunaat nunaanni ataatsimut isigalugu ajortorujussuummat. Taama oqarpoq Henriette Berthelsen, tarnikkut katsorsaasoq ukiorpassuarnilu Danmarkimi najugaqartoq.

- Inupparujussuit aaliangersimasut qallunaat, allamiullu soorunami, aaliangersimasumik taamatut kalaallinut isiginnittarput, aammami takusinnaaneq ajoramikku kalaallit sulerinersut, angerlarsimaffeqannginnersut imaluunniit suliffeqarnersut. Tamanna inunnut annertoorujussuarmik sunniuteqartarpoq. Tarnit nakorsaat misissuinikuupput taamatut avatangiisininngaanniit naqissusiisarmut. Soorlu assersuutigalugu kalaallit imerajuttuusutut naqissuserneqartarput, tamannalu annertoorujussuarmik naleqassutsimut imminullu tatiginermut sunniuteqartarpoq, Henriette Berthelsen oqarpoq.

Danmarkimi kalaallit akornanni inuttut naleqassutsip imminullu tatiginerup appasinnerranik misigisimaneq inuuniarnikkut ajornartorsiortut akornanni kisimi pinnani aammali ulluinnarni inuuninarnikkut ingerlalluartut akornanni takussaavoq.

- Tamakkua qallunaatut oqaluppiarsinnaanatik maanga nuuttut iluamillu angerlarsimaffeqarnatik, annertoorujussuarmik taanna misigisimalertarpaat. Aamma inuit oqaloqatigisartakkakka suliffillit ingerlalluartutut isikkullit, oqaluttuarput taamatut misigisarsimallutik, qallunaaninngaanniik naleqannginnerusutut misigisimasaramik, Henriette Berthelsen oqarpoq.