Kalaallit Danmarkimi najugallit peqqinnginnerupput
Kalaallit pualasuut Danmarkimi najugallit kalaallinit nunaminniiginnartunit peqqinnginnerupput, taama misissuineq Naalagaaffiup Innuttaasut peqqissusaannik misissuisarfiata ingerlassimasaa inerneqarpoq.
Danskit inooriaasiat peqqiillisaataasoq taamaalilluni paasineqartoq, Dr. Marit E. Jørgensen suleqataalu nalunaarusiaminni allapput. Nalunaarusiaq Amerikami inuussutissat pillugit atuagassiami American Journal of Clinical Nutrition-imi saqqummiunneqaqqammerpoq.
Kalaallit nunaminniiginnartut, qangatut nerisaqarnertik, soorlu aalisagartornerunertik, pillugu aavisa naqitsinerat appasinneruvoq orsorlu ulorianartoq timaaniittoq annikinnerulluni. Aamma sukkornermik nappaateqalernissamut ungasinnerusut paasisat takutippaat. Kalaallillu avalassimasut pualanerupput uummamikkullu nappaateqalernissamut qaninnerullutik.
Jørgensen suleqataalu kalaallinik nunatsinni najugaqavissunik 1.316-inik, kalaallinillu Danmarkimut avalassimasunik 995-inik misissuisimapput. Nalunaarusiornermut atatillugu kalaallit Danmarkimiittut 7.000-iunissaat ilanngullugu taaneqarpoq.
