Kalaallit Danmarkimi najugaqartut siornatigut eqqaaneqartarunit amerlanerujussuupput.
Tamanna Danmarkimi Naatsorsueqqissaartarfimmit nalunaarutigineqarpoq. Nunatsinni inunngorsimasut 18.000-nit amerlanerusut Danmarkimi ullumikkut najugaqarput. Atlantikup Avannaani Suleqatigiit savalimmiormiut Danmarkimi najugallit pillugit misissuinertik nangippaat, kalaallinut danmarkimi najugalinnut manna sangutillugu.
Kalaallit Danmarkimi najugalinnik ullumikkut oqartoqaraangat, inuunermikkut ajornartorsiortutut, imerajuttutut, angerlasimaffeqanngitsutullu naatsorsuunneqakkajuttarput.
- Misissuinerput assilissap allaaneruneranik takutitsissajunnarsivoq, Lars- Emil Johansen, Atlantikup Avannaani Suleqatigiinni ilaasortaasoq, oqarpoq.
- Kalaallit tusindtilikkaat Danmarkimi najugaqartut nalinginnarluinnarmik suliffeqarlutik inuupput, Danmarkimilu inuunerissaartitseqataallutik, Lars-Emil Johansen oqarpoq.
Kisitsisit misissuinerlu Nuummi Atlantikup avannaani suleqatigiit naapinnissaani juunimi pisussami saqqummiunnissaat naatsorsuutigineqarpoq.