Kalaallit Brasiliamiunut ajorsarput

Nunatta U-21-ni angutini unammisartui, Amerikap nunavittaani assammik arsarluni unammersuarnerni, Argentinami ingerlanneqartuni ippassaq unnukkut unamminerminni siullermi ajorsarput.
apriilip 15-at 2009 08:30

Nunatta unammisartuisa Brasiliamiut neriulluarfigineqaqisut unammivaat, tassalu 36-29-mik ajorsarfigalugit, naak nikinnermi 14-14-imik naligiissimagaluarlutik.

- Kalaallit assersuisui unammineq tamaat unammilluaraluaqaat, unamminermilu 45 minutsit siulliit qaangiummata naligiillutik. Tamatuma kingornagut saassussisarnerni kukkusaqattaartoqalerpoq, Brasiliamiullu tamanna atorluarlugu saassussisaqattaalerlutik, unammisartut angalaneranni ingerlatsisoq Kurt Lauritsen, taama naliliivoq.

Nunatta unammisartuinut sungiusaasup Jakob Andreasenip ajorsaraluarlutik unammisartut angusaat naammagisimaarpai.

- Unammisaqattaarnerit ingerlaqqinnissaannut neriulluarpunga, taamaattorli oqartoqarsinnaavoq nunat Amerikap nunavittaani assammik arsarlutik unammisartut naligiinnerujussuanngortut, pitsaanerillu pingasut, VM-imut ingerlaqqittussat akornanniissagutta ilungersortariaqarpugut, Jakob Andreasen oqarpoq.

Unamminermi kalaallini Angutimmarik Kreutzmann arfineq-marlunnik isertitaqarluni isertitsinerpaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq