Kalaallit arnataat danskit arnartaannit meerartaarnerusarput
Nunani Avannarlerni Savalimmiut arnataat meerartaarnerpaasarput, agguaqatigiissillugu meeqqanik 2,3-nik meerartaartarmata.
Kalaallit Nunaanni arnat Islandimi arnat assigalugit agguaqatigiissillugu 2,2-nik meerartaartarput, taamaalillutillu Nunani Avannarlerni arnat akornanni meerartaarnerpaasartunut tulliullutik. Kalaallit Nunaannilu naatsorsueqqissaartarfiup kisitsisaatai naapertorlugit, Kalaallit Nunaanni ukioq manna januaarip aallaqqaataagaa innuttaasut 56.615-iupput, ukiup siuliani 56.452-iusimallutik.
Danmarkimi meerartaartartut Nunat Avanarliit akornanni ikinnerpaajugaluartut, agguaqatigiissillugu 1,8-nik meerartaartarnerat, EU-mi agguaqatigiissillugu 1,5-inik meerartaartarnermiit qaffasinneruvoq.
Danmarkimi naatsorsueqqissaartarfimmit kisitsisitigut paasissutissat naapertorlugit, ukioq manna ukiup qaammataani pingasuni siullerni, Danmarkimi meerartaartartut amerlassusaat 1989-miilli aatsaat taama appasitsigaat.
