Kalaallit arlalinnik ujaminnattut
![](/sites/default/files/styles/image_934x467/public/article_images/world_eskimo_indian_olympics2.jpg?itok=Ev2ZAXK3)
Unammiuaarutigineqartuni "olympiade-mik" taaneqartuni, naggueqatigiit Inuit indianerillu pinnguaatitoqaat, qanga ukiukkut sammilluartagaat, tammatsaaliorniarneqarput.
Nunarpullu angusarissaarpoq. Peqataasummi nunatsineersut qulinik ujaminnapput.
Ilulissaneersoq Mikkel Andersen nunatsinneersuni angusarissaanersaavoq, qaartartumik nakkartitsisuusaarnermi kuultinnakkami. Pinnguaammi tassani qasusuissuseq nukittussuserlu takutinniarneqartarpoq, sermitsiaq.ag-ip fairbanksimi tusagassiortua allappoq.
Aamma Mikkel Andersen Aputsiaq Høyilu pakassumminnermi siilvimik bronzemillu pissarsipput, soorluttaaq Susanne Nielsen aamma Helga Nielsen ujaminnattut.
- Kalaallit Nunaannit peqataasut aatsaat taama amerlatigipput, taamaammat soorunami taama amerlatigisunik medaaliannammata nuanneqaaq, Arctic Sport Greenlandimi siulittaasoq, Helga Nielsen sermitsiaq.ag-mut oqarpoq.
Kalaallit suli amerlanerusut aappaagu peqataajumaartut taassuma neriuutigaa, - naggueqatigiit Inuit indianerillu pinguaataat taamaalillutik ilisimaarineqalernissaat neriuutigalugu.
Ukiormanna unammiuaarnerit taamatut ukiumoortumik naapittarnerit 52-issaraat.