Kalaallit Argentinamut ajorsarput

Kalaallit assammik arsarnermi angutini U-21-ni nunanut allanut unammisartut ippassaq unnukkut Argentinamut unamminerminni ajorsartinneqangaatsiarput.
Allattoq Elisa Isaksen
apriilip 17-at 2009 05:42

Nikinnermi kalaallit målinik qulingiluanik kinguaqqareersut unammineq naammassimmat 14-31-mik ajorsarput.

Akutaaneq Kreutzmann ajoqusernermi kingornagut unamminermit anisariaqarsimavoq, aamma isaatitsisuulluartaraluartoq Angutimmarik Kreutzmann minutsini quliinnarni unammeqataavoq.

Sungiusaasuat Jakob Andreasen tamatumunnga ima nassuiaavoq:

- Unammisavut timimikkut nukittoorujussuugamik assullu unammilluarlutik. Taamaattumik unammineq aallartisimatsiaannartoq ajugaaniarnissaq ajornakusuussasoq paasinarsimmat, unammisaqattaarnermi unamminissat tullinnguuttut eqqarsaatiginiarlugit aalajangiupparput, taamalu Aqqaluk Sørensen aamma Angutimmarik Kreutzmann minutsini quliinnarni unammeqataatillugit, Jakob Andreasen oqarpoq.

Taassuma unamminissat tullinnguuttut angusaqarfiginiarneqarnissaat pingaartutut taavaa.

- Pisussat isiginiartariaqarpavut, tassami VM-imi peqataanissamut anngussinnaassagutta, unamminissat tulliuttut marluk uatsinnut pingaaruteqaqimmata, Jakob Andreasen oqarpoq.

Ualimut maani nalunaaqutaq sisamanngorpat nunanut allanut unammisartut Uruguay unammisussaavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq