Kalaallit angutitaat inuunertusipput

1990-imut sanilliullugu siorna 2011-mi kalaallit angutitaat ukiunik 7,6-inik inuusarneri sivitsorsimapput, qaffariaat procentinngorlugu 12,5-iulluni, nunanut avannarlernut allanut sanilliullugu qaffariaat annertunerpaalluni.

Finlandimi angutit tullersortaapput, tassani qaffariaat procentinngorlugu 9-ulluni.

Kalaallit angutit nunani avannarlerni inuusarneri sivitsoraluartoq taamaattoq nunanut avannarlernut allanut naleqqiullugu, kalaallit inuusarneri suli sivikinnerpaajuvoq, tassa ataatsimut katinneranni 68,3-inik sivisutigisumik inuusarlutik, finlandimiut ukiuni 77,2-ni danskillu ukiuni 77,3-ni inuusarlutik.

Nunanili avannarlerni nunanilumi allani arnat inuusarneri angutinut naleqqiullugu suli qaffasinneruvoq.

Nordisk Statistisk Årbogi ukiormanna saqqummersut 50-issaraat. Ukiullu taakku malunnartinniarlugit, ukiuni kingullerni 50-ini Nunani avannarlerni susoqartarsimanersoq eqqartorneqarluni. Taamani ukiut 50-it matuma siorna atuagaq saqqummersinneqartalermat Nunatsinnit, Savalimmiunit aamma Ålandimit kisitsisinik takussaasoqarsimanngilaq, aatsaalli tamanna kingusinnerusukkut pisalersimalluni.