Kalaallit Angola-miullu assammik arsarlutik unamminerat naammasseqqammerpoq kalaallit ajorsalaarput tassa 28 / 29-mik arsarneq inerneqarpoq.
Taannalu Assammik arsarluni nunarsuarmi pissartanngorniunnermi kalaallit unamminerisa kingullersaraat.
Angutimmarik Kreutzmann
Nunarsuarmi pissartanngorniuttoqarnerani nunani tamalaaniit maluginiarneqarsimaqaaq.
Ilaatigullu aviisit ilaat ima qulequtsiisivoq; ”tamarmik Angu nuannaraat”. Aallaqqaammut Angutimmariup aqqa taajuminaatsinneqartarsimagaluarpoq maannalu atia Angu-mik naalisarlugu taakkartortuarneqalersimavoq.
Nutaarsiassaqartitsivik Ritzau allaaserisaqarpoq, Kalaallit Nunaata siullermeerluni Sloveniamut unamminerani Angutimmarik quleriarluni isertitsimmat tamanit maluginiarneqartorujussuanngorsimasoq. Isiginnaartunit nuannarineqarnera unnersiutigineqaqaaq, Angutimmarillu arsarluarnerpaatut toqqarneqarami qullilisimanera nutaarsiassaqartitsiviup ritzauip aamma eqqaasimavaa.
Angutimmarik Kreutzmann Silkeborg-Voel-imi Danmarkimiittumi ulluinnarni arsarnermik ingerlatsisarpoq.