Kalaallit Airports: Qullersaqarfimmiittut amerlineqarput
Suliniutinut pisortat suliniutinullu pisortap tullia Kalaallit Airportsimi ilaasortanngorput.
Kalaallit Airportsip siulersuisuisa siulittaasuata Jóhannes Egholm Hansenip ataatsimeersuarnerit arfineq-aappaani tamanna oqaatigaa. Suliniutinut pisortanngortussaq tassaavoq Johannes Ehmanns, Tysklandimeersoq. Taanna ingeniøritut ilinniagaqarpoq, mittarfiillu pillugit immikkut ilisimasaqarluni.
- Mittarfissanik iluarsartuussilluni pilersaarusiornissani, sanaartornissani aammalu ingerlatsilertuinissani nunarsuarmi sumi tamani pissutsit eqqarsaatigineqarsinnaasuni assigiinngilluinnarfiusinnaasuni misilittagaqartoq, tamatumani aamma Sibirien, Jóhannes Egholm Hansen ilaatigut oqarpoq.
Suliniutinik pisortap tulliatut atorfinitsinneqartoq tassaavoq illussanik titartaasartutut ilinniagalik Aviaaja Karlshøj Knudsen, Kalaallit Airportsimi suliniutinik 2017-imili pisortaasimasoq.
AAMMA ATUARUK Mittarfiit sanaartornissaannut neqerooruteqarnissamut piffissaq sivitsorneqartoq
Taakku Kalaallit Airports A/S-imi pisortaaneq Peter Wistoft tassani suleqatigissavaat
Kalaallit Airportsimi qullersaqarfimmi sulisut amerlineqartut, siulersuisuni ilaasortat ikilipput. Ilaasortat arfiniliusimariarlutik maanna sisamaannanngorput.
Tamanna siulersuisunut ilaasortat taakku piginneqatigiiffimmi allamik aqunneqartumiinnissaannik kissaateqarnermit aallaaveqarpoq.
Kalaallit Airportsip ataani ingerlatseqatigiiffiit ukuupput Kalaallit Airports Holding, Kalaallit Airports Domestic aamma Kalaallit Airports International. Louise Hasle Peter Christiansenilu siulersuisuni ilaasortaajunnaarput.
Naalagaaffik Kalaallit Airportsimi siulersuisunut ilaasortassanik marlunnik toqqaasarpoq, taamaalilluni Merete Eldrup Marlene Haugaardilu ilaasortanngussallutik.