Kalaallisuumiit amerikamiutuumut ordbogiliorput

Amerikamiut aningaasaateqarfiat National Science Foundation tapiissuteqartuuvoq kalaallisuumiit amerikamiutuumut aamma amerikamiutuumiit kalaallisuumut ordbogiliornermut.

- Amerikamiutut tuluttooriaaseq toqqarsimavarput Issittumi siunnersuisooqatigiinni, ICC-mi aammalu niuernikkut attaveqatigiinnerni amerlasuuni amerikamiut tuluttooriaasiat aallaaviusarmat, Oqaasileriffimmi allaffimmi pisortaq Carl Christian Olsen, Puju, KNR-mut oqarpoq.

Oqaatsit aammalu oqaatsinut uiggiussassat ordbogimi ilaatinneqartussat maanna aalajangersorneqaleruttorput atuisussatullu siunnerfiit tassaapput inuusuttut 15-it 20-illu akornannik ukiullit.

Oqaatsit nutsernerat toqqaannartumik kalaallisuumiit amerikamiutuumut pissaaq aamma amerikamiutuumiit kalaallisuumut taama pissalluni.

- Siornatigut nutserisoqartarpoq kalaallisuummiit qallunaatuumut nutseqqaarlugit tassanngaanniillu tuluttuumut nutseqqillugit. Tassani oqaatsit kimikillisarput. Taamaammat maanna oqaatsit allat aqqusaanngikkaluarlugit toqqaannartumik nutserniarpagut, Carl Christian Olsen, Puju, nassuiaavoq.

University of Chicago kalaallisut oqalussinnaasumik sulisoqarpoq taannalu ordbogiliornermi suleqataassaaq.

Leonore Grenoble aamma Jerry Sadock University of Chicago sinnerlugu suleqataassaapput aammalu oqaatsit pillugit ilisimatusarnikkut phd-nngornianik ikiorteqassallutik. Oqaasileriffik sinnerlugu suleqataapput Carl Christian Olsen, Puju, aamma Katti Frederiksen.

Ordbogi aamma qarasaasiat atorlugit aaneqarsinnaasunngussaaq, tamannarpiarlu phd-nngorniat isumagissavaat.

Ordbogissap qaqugu saqqummernissaa suli ullulerneqanngilaq.

- Ordbogiliortarnermi suleriaatsit malillugit suliarineqassaq. Taamaasilluni oqaatsinut allanut kalaallisuumiit ordbogiliortoqassappat aamma atorneqarsinnaassaaq, Carl Christian Olsen, Puju, oqarpoq.