Ilisimatusarfiup siulersuisuisa siulittaasuat Minik Rosing.Assi: Kirsten Ellebæk/DR

Minik Rosing: Kalaallisut oqalussinnaasuunissaq qinnuteqartussanik ikilisaataassaaq

Ilisimatusarfiup siulersuisuisa rektorissarsiornerminni qinnuteqartut amerlasuunissaat pingaartippaat. Taamaammat kalaallisut oqalussinnaasuunissaq piumasaqaataanngilaq, tamannalu IA-mi politikkerip Mimi Karlsenip ujartorpaa.

Ilisimatusarfimmi rektorinngortussaq kalaallisut oqalussinnaasuusariaqarpoq.

Inatsisartuni ilaasortaq Mimi Karlsen taama isumaqarpoq. Taassuma rektorissarsiornermi piumasaqaat maluginiarsimasaa imatut allassimavoq: "Kalaallit oqaasiinik ilisimasaqarneq pitsaaquteqassaaq, kisianni piumasaqaataanngilaq".

AAMMA ATUARUK Kalaallisut pisinnaasaqarnissaq pingaartuusoq

Ilisimatusarfimmi kina rektoritut atorfinissanersoq tassani siulersuisut aalajangertussaavaat.

Rektorissarsiornermilu kalaallisut oqalussinnaasuunissaq piumasaqaataassappat, qinnuteqartussanik ikilisaataassasoq, ilisimatusarfimmi siulersuisut siulittaasuat Minik Rosing oqarpoq.

- Kalaallisut oqalussinnaasuusumik aammali ilinniagartuumik atorfinitsitsiniarnissaq ajornanngilaq. Taamaalioraannili qinnuteqarsinnaasut ikilissapput, arlalinnillu toqqangassaqaraanni ikinnernik toqqangassaqarnermit pitsaaneruvoq. Siulersuisut, soorunami Mimisulli, kalaallisut oqaaseqartuusumik atorfinitsinissamik kissaateqarput, Minik Rosing oqarpoq.

Ilisimatusarfik pillugu inatsit malillugu sulinertik, taassuma aamma erseqqissarpaa.

Mimi Karlsenillumi siulersuisunut naalakkiisinnaanani nassuerutigaa.
- Ataqqilluinnarpakka, siulersuisut namminneq aalajangiissapput kisianni uani ersersippakka uanga pingaartitakka, tassalu oqaatsitta pingaartinneri aamma piumasaqaatigisarnissaat ilianniarfinni qaffasinnerusuniugaluarpat. Taamatut piumasaqaateqartarnissaq pingaartikkakku, Mimi Karlsen KNR-imut oqarpoq.

Rektorissarsiornermi piumasaqaatit uani takusinnaavait



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl