Maili takussutissiivoq: Kalaallisut oqalugiarnissaq folketingimi oqallittoqarnissaanut akunniinnanngortoq aatsaat ilisimatitsissutigineqartoq
Sermitsiaq.AG-miit paasissutissanik nutaanik ilallugu nutartigaavoq.
Aki-Matilda Høegh-Dam (S) Folketingip oqaaseqartarfianit tallimanngorneq maajip aqqaneq-aappaani oqalugiarpoq, tassanilu kalaallisut oqalugiarluni.
Kisianni nalunaaqutaq aatsaat 12.01 – tassa oqalugiarnissaanut akunniinnanngortoq – Folketingip Siulittaasoqarfia Aki-Matilda Høegh-Dam kalaallisut oqalugiaatissaminik piareersaasimalluni mailimik nassiussimmat ilisimatinneqarpoq.
Tamannalu pissutigalugu Folketingip ataatsimiittarfiani naalagaaffeqatigiinneq pillugu ukiumoortumik oqallinnermi pissanganartorsiortoqarpoq. Folketingip siulittaasua, Søren Gade KNR-imut oqarpoq.
- Foketingip ataatsimiittarfiani siulittaasup issiaviata eqqaani issiasunut aatsaat oqarpoq, taanna oqarpoq.
Aki-Matilda Høegh-Damip kalaallisut oqalugiarnini Folketingip Siulittaasoqarfianut sapaatip akunnera ataaseq sioqqullugu paasissutissiissutigisimallugu oqalugiarnermi kingorna Sermitsiaq AG-mut oqaatigaa.
Taamaattoqanngitsorli, Søren Gade oqarpoq.
Aki-Matilda Høegh-Damip oqaatigisaa eqqunnginneraraa
Taassuma Aki-Matildap suliamut atatillugu oqaaseqarnera ilisarisinnaanagulu siulittaasoqarfimmut ilisimatitsereersimaneraanera eqqunnginneraraa.
- Suleqatiga Erling Bonnesen siulittaasup issiaviani issiavoq, taannalu oqalugiartoqanngilaarnerani aatsaat ilisimatinneqarsimavoq. Taamaammat oqalugiartoqarnissaanut ullualuit sioqqullugit oqartoqarsimanerarneqarnera ilisarisinnaanngilara, Søren Gade oqarpoq.
KNR-ip Folketingip Siulittaasoqarfiani paasissutissarsiarisai naapertorlugit Aki-Matilda Høegh-Damip kalaallisut oqalugiaatissani danskisullu nutserneqarnera aatsaat nalunaaqutaq 12.01 nassiussimavaa, tassa Folketingimi oqaaseqartarfimmukarnissaanut akunneq ataaseq sioqqullugu. Attaveqaqatigiineq taanna KNR-ip takuaa.
Nammineq najuukkusukkaluartoq
Taassuma ullormi tassani Erling Bonnesenip siulittaasup issiavianiinnera erseqqissaatigaa, Aki-Matilda Høegh-Damillu kalaallisut oqalugiarniarnera paasissutissiissutigineqareersimagaluarpat siulittaasoqarfiup Søren Gadep ulloq taanna siulittaasup issiavianiinnissaa isumagisimassagaluarpaa.
- Taama pisoqarnissaa ilisimasimagaluarukku nammineq issiavimmiissimassagaluarpunga. Pisormi ataatsimiittarfimmi oqaatsit allat atorlugit oqalussinnaasoqarnissaanut allannguutaavoq, taanna oqarpoq.
Søren Gade Folketingimi Siulittaasoqarfiup Folketingip ataatsimiittarfiani kalaallisut oqalunnerup toqqaannartumik nutserneqarsinnaalernissaanut periarfissanik misissuisoqarnissaanut aalajangerneranut atatillugu taama nalunaaruteqarpoq.
KNR-ip Aki-Matilda Høegh-Dam oqaaseqartinniarsaraa. Taannali suliamut atatillugu oqaasissaqanngilaq, apersorneqarumananilu.
Aki-Matilda Høegh-Dam Folketingip siulittaasoqarfia attavigisimallugu oqarsimanngisaannarluni Sermitsiaq.AG-imut allaaserisap matuma saqqummereernerani sisamanngornermi ualilluartoq ilisimatitsivoq.
Folketingimut ilaasortap Sermitsiaq.AG-mut nammineq oqarnera naapertorlugu, Aki-Matilda Høegh-Dam Inatsisinut tunngasunut allattoqarfimmut saaffiginnisssimavoq.
- Inatsisinut tunngasunut allattoqarfik attveqarfigaarput, tassanngaannillu oqarput, taamaaliorniarutta oqalugiaaat oqaatsinut allariinnut allaganngorlugu nassiutissagipput, tamaaliorpugullu. Allaanerusumik iliorsimaneranngisaannarpugut, Sermitsiaq.AG-mut oqarpoq.
Aki-Matilda Høegh-Damip Sermitsiaq.AG-mik attaveqarnerani kukkusoqarsimassasoq, folketingimut ilaasortaq isumaqatoq, Tusagasssiorfik allappoq.
KNR-ip Aki-Matilda Høegh-Dam suli oqaaseqartinniarsaraa.