Kalaallisut oqaatsit Sisimiuni isummersorfigilluarneqarput

Taseraliup inersuani issiaviit amerlanersaat inunnit 200-it missaanniittunit ingiffigineqarsimapput, politikerit sisamat, partiimi siulittaasoq, folketingimi ilaasortaq, inatsisartuni ilaasortaq kiisalu borgmesteri, tamarmik Siumumeersut oqallissaarisoralugit oqaatsigut sammineqarmata.

-Nuannaarlutalu nuannaanngillutalu pissusilersuutigisartakkagut tamarmik oqallisigineqaramik taqqamani assut ammasorujussuarmik, nuannequtigivaa taannartaa. Ukua, qanga aliasuutigisartakkat illuatungaanut saallugit aamma nukittoqutigisinnaagigut ullumikkut aamma taakkua oqariartuutigineqartut assorsuaq tassani nuannerpoq, taanna siumut isiginermik annertuumik takutitsisuuvoq, najuuttut ilaat Inger Eriksen oqarpoq.

Oqallinnerlumi uummaarissumik, eqeersimaartumik, aalajangersimarpaluttumik ilaatigullu illalaarfiusarluni akunnerit marluk sinnilaarlugit ingerlanneqarpoq.

- Oqaatsitta pingaartinneqarnerat assut nuannaarutigivara, Marius Lange oqarpoq.

Oqallitsitsinermi qitiuvoq siorna Namminersorneq eqqunneqarmat oqaatsitta pisortatigoortumik oqaasiulernerat.

- Annerpaamik Inatsisartuni oqaatsitta atorneqalernissaat soorunami aamma uanga nammineq taama isumaqarfigivara., Marius Lange nangippoq.

Tupinnanngitsumik naalakkersuinermi nunamillu aqutsinermi oqaatsitta inissisimanerat isummersorfigineqangaatsiarput.

- Inuit qinersimasaat ataqqivakka, kisianni naalakkersuisunngortut ilaat kalaallisut oqalussinnaanngimmata pakatsisimavunga, soorunami sullitassaat amerlanerpaat kalaaliummata, Marius Lange oqarpoq.

Oqartarpugut nunarput marluinnik oqaaseqarfiusoq, nutserinerujussuarmilli kinguneqartitsisumik, oqallinnermilumi tamanna sammineqarluarpoq.

Inger Eriksen isumaqarpoq, siunissaq eqqarsaatigalugu nutserinerujussuup asoorukkiartuaarneqassasoq.

- Asoorukkiartornissaa naatsorsuutigaara, aamma taamaattussaassaaq, oqarpoq

Kalaallisut oqaatsit illersorneqassappata iliuuseqartoqartariaqartoq, Samson Larsen oqarpoq.

- Soorlu aningaasanik taamatut atuinerput arlaatigut inatsisiliuunneqartariaqarpoq oqaatsigut illersussagutsigit, oqarpoq.

Oqallinnermi nunat allat assersuuteqarfigineqallattaarneranni Islandimiut oqaatsiminnik pingaartitsillutik ineriartorsimanerat sammineqarluartut ilagaat.

- Taanna nukittoqutiginikuusaat, uagut tassuuna aamma qiviartariaqarpagut; qanoq-una iliorsimagamik, susaramingukua taamatut imminnut ullumikkut tatigitigalutik avammut aamma saqqummertartuusut. Uagut aamma taanna pisariaqartikkatsigu, tatiginerunissaq immitsinnut, Inger Eriksen isummersorpoq.

Uagut kalaallit akunnitsinni oqaatsinik atuinitsinni allamiunullu oqaatsitsinnik ilinniartitatsinnut pissusilersuutigisartakkagut sammineqarluartunut ilaapput.

Inger Eriksen iliuuseqaqqusivoq.

- Uparuartuiinnarata, qanorlu oqarsinnaanitsinnik aamma oqalliseqataasinnaanitsinnillu oqariartuuteqarnerugutta, immaqa aamma taanna pitsaaqutigissaqaarput, oqallissinnaaneq immaqa tassani pilersinnaagunarpoq.

Oqallitsitsinermik aaqqissuisuuvoq Inatsisartuni ilaasortaq Malik Berthelsen (S) taassumalu ullaaq Iterluarnaami oqaatigaa, illoqarfimmi allami aamma taamatut aaqqissuussilersaarlutik.

Ilanngutassiaq unnugu Qanorooq-mi takuneqarsinnaavoq.