Kalaallisut oqaasillit mininneqartussaanngillat

Aviâja Egede Lynge Skotlandimi The edinburgh university-mi socialantropogi-tut ilinniagartuutut angusaqarsimasuuvoq.

Nuummi innuttaasut ilaata Piitannguaq Tittussenip Alcoa pillugu nalunaarusiap kalaallisuunngortinneqarsimannginnera sapaatip-akunnerata siuliani Qanoruukkut uparuarpaa. Taassuma taama uparuaanera Aviâja Egede Lyngep taperserlugu Qanoruukkut oqaaseqarpoq.

- Innuttaasut kalaallisuinnaq oqaasillit peqataatinneqanngillat, ineriartornermi inuit peqataatissagaanni paasissutissiisoqarsinnaavoq aamma peqataatitsisoqarsinnaavoq. Nalunaarusiap saqqummiunneqarnerani inuit peqataavillutik isummerlutillu pissagunik nalunaarusiap atuaqqaarnissaanut periarfissinneqartussaapput, Aviâja Egede Lynge oqarpoq.

Kalaallit oqaasii inatsisitigut pingaarnertut inissisimapput, tamannalu naalakkersuinikkut qinersisartullu aqqutigalugit aalajangigaavoq. Alcoamullu suliniut inuiaqatigiinnut tunngalluinnartuummat kalaallisuinnaq oqaasillit pinngitsooratik ilaatinneqartariaqarnerat Aviâjap erseqqissaassutigaa.

- Pissutsit taamaattarnerat sungiusimanikuuagut kisianni oqaatsigut pingaarnerpaanngoreertillugit tamanna akueriuminaatsorujussuuvoq, Aviâja oqarpoq.

Taanna nangilluni erseqqissaavoq nunani allani pissutsit taamaattut ilisimatuunit eqqumaffigineqaqqissaartartut, qulaaniillu ammut isiginninnertut nalilerneqartarlutik. Taamaattumillu periutsit nutaat ujartorlugillu inerisarneqartarsimallutik.

- Nalunaarusiat tamakku fagfolkinit ekspertinit suliaasut innuttaasunut tigussaasunngortinneqartussaapput, tassami naammanngilaq kalaallisuinnaq nutserneqassappata, kalaalerpassuit qaffasissumik ilinniarsimanngitsut nalunaarusiap imaa paasissagunikku paasiuminaatsissinnaavaat, taamaattumik tulluarsarlugit tigusssaasunngorlugit innuttaasunut tunniunneqartariaqarput. Assersuutigalugu nakorsap nalunaarusiai uagut nakorsaanngikkutta aamma paasisinnaanngilagut, Aviâja Egede Lynge Qanoruumut oqarpoq.

Aviâja Egede Lynge aamma isumaqarpoq, nalunaarusiaq kalaallisuunngortinneqarlunilu atuartussanut tigussaasunngortinneqartariaqartoq.