Kalaallisut oqaaseqanngitsut ilinniarniarusuttut Naalakkersuisut ikiulerpaat
Naalakkersuisut "Innuttaasut tamarmik kalaallit oqaasiinik atuisinnaanissaat qulakkeerniarlugu suliniutissat pillugit periusissaat pillugu nassuiaat", Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoqarfimmit suliarineqartoq, maannakkut avammut saqqummiunneqalerpoq.
Suliniutit periusissiami allattorsimasut piviusunngortinniarlugit suleriaqqinnissaq Naalakkersuisup Nick Nielsenip qilanaaraa.
- Suliaq siulleq aallartinneqartussaq tassaavoq kalaallit maani najugaqartut assigiinngitsunik pissuteqarlutik danskisut oqaaseqarnerusut paasiniaavigineqarnissaat. Siunertaavoq taakku amerlassusaannik, aamma suliniutissatut kissaataannik siunnersuutaannillu paasiniaanissaq, taamaalilluni kalaallisut annertunerusumik oqalussinnaaniassammata. Paasiniaaneq iliuusissatullu pilersaarut ilimagineqarput ukiaru piariissasut, Nick Nielsen oqarpoq.
Tamassuma saniatigut siunissami qanittumi oqaatsit pillugit isumasioqatigiinnissaq Nick Nielsenip kissaatigaa, tassani periusissiami iliuusissatullu pilersaarummi sammisat ilaat oqallisigineqassallutik, aammalu periusissiaq tassanilu suliniutit Inatsisartut maannakkut upernaakkut ataatsimiinneranni immikkoortut arlallit suliarineqarneranni oqallinnerni ilanngunneqassagunarput.
