Kalaallisut nipilersukkat 1990-ikkunneersut toqqrtaatigineqarusupput
Tamannalu anguniarlugu katersugaasivimmit kassettebåndit, CD-t allallu immiussaatigineqartut taamatullu 1990-ikkunni nipersortartut assigi plakatiliarineqarsimasut katersorneqalerneri aallartinneqarluni.
Katersugaasivimmit pigineqareersut tassaapput 1950-ikkunnit 1990-ikkut tikinngilaarlugit nipilersuutit.
1990-ikkunniillu nipilersuutinik allanillu taakkununnga attuumassuteqartnik pigisaqartut, katersugaasivimmut tunissuteqarnissaat, Nunatta Katersugaasiviani sulisup, Bo Albrektsenip kaammattuutigaa.
- Katersugaatitsinni takusinnaavarput 1990-ikkut missaanni saqqummersinneqarsimasunik amigaateqarluta, taakkulu piginnittuinit iginneqartinnagit immikkut illuinnartumik iliuuseqarluta katersorniarpagut, Bo Albrektsen oqarpoq.
1990-ikkunni nipilersukkanik peqaruit tunniussinnaavatit
Nipilersortartut tusaamaneqarluartut minnerunnitsumillu tusaamaneqarpallaanngitsut saqqummersitaannit katersugaasivik pissarserusuppoq.
- 1990-ikkuni nipilersortartut tusaamaneqarnerusut nuannarineqarluartullu pigaagut tassalu nipilersortartut tusaamaneqannginnerit katersugaatineqarnissaat soqutigisalutigu, Nunatta Katersugaasiviani atorfilik Bo Albrektsen taama oqarpoq.
