Kalaallisut allattarneq ulorianartorsiorpoq
Atuakkap "From oral tradition to rap"-ip atukkiarinerani, kalaallisut atuakkiortarneq ukiuni kingullerni sumut killinnersoq Karen Langgaardip atukkioqataatalu Kirsten Thistedip misissorpaat. Atukkiortoqarpiarsimanngitsorlu paasivaat.
- Erinaligaanngitsunik taalliaqanngingajappoq, inuussuttullu taalliunngilluinnarput. Aaju - Kristian Olsen saqqummersitsinikuuvoq, Ole Korneliussen oqaluttualiaminik saqqummersitsinikuuvoq, kisianni inuusuttut atuakkiaannik soqanngivippoq, Karen Langgård atuakkiornermi killiffik nikallunganartoq pillugu oqarpoq. Tassalu tamaammat ajornartorsiuterujussuaqartoq isumaqarpoq.
- Kalaallit oqaasii uummaarissuunerarlugit oqartarnerput ilumoorpoq, uangali universitetimi ilinniartitsisutut aviisinillu atuartartutut ernumallunga nassuerutugisarpara, kalaallit oqaasii allaqqaanermi atorneqarneq ajortut, nutserillunili annermik atorneqartartut. Tamannalu kalaallit oqaasiinut uloarianartorsiortitsivoq, Karen Langgaard oqarpoq.
Pissutsit taamannerannut suummita peqqutaappat? Pissutsit assigiinngitsut peqqutaasut, Karen Langgaard isumaqarpoq.
Ajornartorsiut imminut sakkortusarpoq. Naammattumik allattoqanngikkaangat, taava aamma isumataarfissamik kajumissarfissamillu saaffissaqanngilaq. Taamaanneratalu kalaallit oqasii nuannaartunanngitsumik inissisimatippaat.
- Inuussuttut allappiarneq ajorput. Aamma Kalaallit Nunaanni uummaarissumik allattartuerukkiartorpoq. Aammami sooq kalaallisuumut nutsikkanik pikkunaattunik allatanik atuartassappat? Aamma sooq namminneq allattassappat? Kalaallit oqaasiisa nutserinermut atugassaannartut inuusuttunut saqqumilersinneqarnerat ajorluinnarpoq, Karen Lanngård oqarpoq.
Atuakkiat kalaallisut saqqummersinneqartartut, nunap inoqqaavi, inuiaassuseq pillugu kalaallit nunaannilu inuiaqatigiinni ajornartorsiutit pillugit annerusumik atuakkiarineqarput, pissutsit piviusut oqaatigineqassappata, tamakkua pillugit atuarusunngilluinnarpugut, Karen Langgårdip isiginninnera malillugu taamaappoq.
Atuakkat suut atuarneqarnerusarpat ?
Nunat allamiut pinerluttulersaarutaat assigisaallu atuarneqarnerupput, isumaqartoqarlunilu, atuakkat kalaallisut allatat annerusumik kalaallit nunaanni pissutsit pillugit atukkiaanerusariaqartut.
- Aap pissanganartuusinnaapput quujanartuullutillunii. Qanga kalaallit atukkioriaasiannut attuumassuteqarsinnaavoq, Karen Langgaard oqarpoq.
Tusagassiuutit qarasaasianilu sammineqarsinnaasut amerliartorlugit atuakkiat atuarneqarnissaannut unammillerneqarput, Karen Langgaard oqarpoq.
Minnerunngitsumik erseqqissarpaa, kalaallit oqaasiisa uummarissarneqarnissaannut aningaasat apeqqutaasut, taakkua naalakkersuinikkut sulialinnit pingaartinneqarnerunngitsut, Karen Langgaard oqarpoq.
Atuagaq 'From Oral Tradition to Rap', ilanngutassiap aallartinnerani eqqaaneqartoq, Ilisimatusarfik aamma atuakkanik saqqummersitsisarfik Atuagkat suleqatigiillutik saqqummersipaat, taanna septemberip qaammatanni saqqummerpoq.