Kalaallip Labourikkut ajugaanissaat neriuutigaa

Qinersiviit matunngitsiarneranni kalaaleq Tuluit Nunaata qiterpasissuani Coventrymi ukiuni qulini najugalik, Camilla Hegelund Aasianneersoq oqaloqatigaarput.

- Qinersineq pissanganartorujussuuvoq. Nalunngisakka tamarmik qinersiartorrapput. Neriuutigaarput partiit Labour aamma Labour Democrats ajugaajumaartut. Taakku partiit ilaqutariinnik meerartalinnik ikiuiniartuupput, Camilla Hegelund oqarpoq.

Partiit taasaasa assersuutigalugu arnar angerlarsimaannartut suliffeqarusuttut sulilernissaannik ikiortarpaat, taamaammat partii konservative ajugaassagaluarpat, ilaqutariit ikiorniarneqarnerat ajorseriassasoq Camilla Hegelundip ilimagisinnaallugu oqaatigaa.

Tuluit Nunaanni ulloq qinersivik qanoq naassanersoq Camilla Hegelundip pissanngatigaa.

- Qinersineq qulinut naammasseriarpat Nutaarsiassaqarfissuup BBC-p aallakaatitsinera malinnaaffigissavarput. Ilimagaara unnuaru marluk pingasut missaanni naammassissasoq, oqarpoq.

Camilla Hegelund angerlarsimaffimmini meeqqanik paarsisarpoq, ukiunilu qulini Tuluit Nunaanni najugaqarluni.