Kalaallip assiliisartup nunami allamiut saqqummersitseqatigigai
Eqqumiitsuliortut pingasut - Inuuteq Storchip, Igor Moralesip aamma Nathalie Guiop nunatsinniit, Brasilienimiit Columbiamiillu aggerfeqartut - saqqummersitsinerminni Chirts&Cloves-imi asanninnermut tunngasut paasisassarsiorfigisimavaat.
Kalaaleq inuusuttoq Inuuteq Storch assiliisartuuvoq. Taassuma assiliinermut ilinniarfik ataqqisaasoq Fatamogana Danmarkimiittoq aamma International Center of Photography New Yorkimiittoq ilinniarfigisimavai. New Yorkimiinnerminilu Igor Morales Brasilienimeersoq aamma Nathalie Guio Columbiameersoq naapissimallugit.
Tamatumalu kingorna asanninnermut inuusuttuunermilu inuunermut tunngasumik assiliisarnissamik suliniuteqalerput.
Eqqumiitsuliortut akornanni naapeqatigiinnikkut asanninnerlu nuannersoq tunngavigalugit qulequtaq pinngorpoq. Chirts hearts-illu (tassa uummataasat) nipaat assigiingajannerat atorlugit oqaatsinik pinnguarneruvoq, aammali ikiaroornartumut/eqqissisaatitalimmut tunngatillugu oqariaartaasiulluni.
Cloves isumaqarpoq nellike - akuutissaq tungusunnitsoq.
Saqqummersitsineq Nuumi eqqumiitsulianik saqqummersitsivimmi sisamanngormat ammarnersiorpoq januaarillu 20-ani unnukkut kulturisiortitsisoqarnerani saqqummersitat aallaavigalugit assiliillaqqinneqqusaatsitsisoqassalluni.
