Kalaallip aningaasamut ilusiliaa nersornaaserneqarpoq
Danmarkimi aningaasaliortarfik Den Kongelige Mønt, aningaasamik kuultiusumik 2008-mi pitsaanerpaamik saqqummersitaqartutut nersornaaserneqartussanngorpoq.
Allattoq Lotte Holm
Aningaasaq pineqartoq tassaavoq Issittup aningaasaanik taaneqartoq, nannumik assiliartalik, Issittup Ukiuinut atatillugu saqqummersinneqartoq.
Aningaasaq kalaallimit eqqumiitsuliortumit 42-nik ukiulimmit Niels Motzfeldtimit, suliarineqarpoq.
Niels Motzfeldtip siusinnerusukkut aningaasat Nukariinnik taaneqartut Nationalbankip saqqummersitai suliarinikuuai.
Aningaasaq ajugaassutigineqartoq 1.000 koruuninik akeqarpoq. Nunattalu kuultianit Nalunameersumit sanaajulluni.
Nersornaasiineq februaarip arfineq aappaani Berlinimi tunniunneqassaaq.