Kalaallinut Washingtonimi alutornartumik ulloqartitsipput
Kalaallit Nunaat Uumassusilerineq pillugu Washingtonimi katersugaasivissuarmi ippassaq immikkut sammineqarpoq. Uumassusilerinermik katersugaasivik pineqartoq katersugaasiviit Smithsonian Institutionip ataaniitut ilagaat, katersugaasiviit USA-mi tusaamaneqarnerit ilaat tassani takuniarneqarsinnaallutik.
Eqqumiitsuliortut Nunatsinneersut 20-t sinnilaarlugit saqqummersitseqataapput, Uummannami inuusuttut ornittagaaneersut aamma peqataallutik.
Issittoq pillugu Smithsonian Institutionimi immikkoortortap pisortaata William Fitzhughip Radioaviisimut oqaatigaa kalaallit aliikkusersuillutillu saqqummersitsinerat alutornarlunilu pikkunarsimaqisoq. Nipilersornerup saniatigut filmiliaq INUK takutinneqarpoq, soqutigineqarsimaqalunilu.
- Taamaammat oqarsinnaavugut saqqummersitsineq iluatsilluarsimasoq, William Fitzhugh oqarpoq.
Filmiliaq INUK, USA-mi Canadamilu filmertarfinni assigiinngitsuni immikkut toqqakkani qaammatini tulliuttuni takuteqattaarneqartussaavoq, tassungalu atatillugu Smithsonian Institutionimi takuteqqaarneqarluni.