Kalaallinut ikiortarialinnut iliuusissaq isumaginninnikkut suliniutinut iluaqutaanavianngilaq
Kalaallit Danmarkimut nuuttut tikinnerini pitsaanerusumik tikilluaqquneqassapput, inuiaqatigiinni danskini ikiorneqanngitsoortoqannginnissaa pinngitsoortinniarlugu. Peqatigitillugu kalaallit ikiortariallit Danmarkimi najugaqartut suliniarfigineqarneri namminersortut kommunillu suleqatigiinninnerisa pitsaanerusumik ataqatigiissarneqassaaq. Danskit naalakkersuisuisa kalaallinut ikiortarialinnut iliuusissaanni nutaami, Isumaginninnermut aqutsisoqarfiup kommuninut nassiussuuteqammisaani, qulequttat pingaarnerit taama oqaasertaqarput.
Kalaallinut iliuusissamik taasaq, Danmarkimi kommuninut anginernut tallimanut Københavnimut, Aarhusimut, Odensemut, Aalborgimut Esbjergimullu atorneqassaaq. Kommunit taamaasillutik ukiuni tullerni sisamani suliniutinut iliuusissami siunertariaqartup iluaniittunut tapiiffigineqarnissamik qinnuteqarsinnaapput.
Kalaallit Illuutaanni Odensemiittumi pisortap Kirsten Mærskip kalaallinik ikiortarialinnik ajornartorsiutip pimoorunneqarnera nuannaarutigaa, Kalaallit Illuutaasali satspuljekkut suliniutinik ataavartumik aningaasalersorneqarnissaasa qulakkeerneqannginnera uggoralugu.
- Suliniut nutaajuvoq, nassuiaaqqittariassallutalu, tamannali ukiuni arlalinngortuni suliarisimavarput. Ajornartorsiutigineqartut pillugit nalunaarusiarpassuit nassiuttareerpagut. Taamaammat taakku aallaavigineqarnissaat kissaatigigaluarpara, suummi pisariaqartinneqarnersut ilisimareerparput.
Kalaallinut iliuusissamut aningaasat katillugit 13,4 millioner koruunit immikkoortinneqarsimapput. Taakkunanngalu affaasa missaannaat kommuninit qinnuteqaateqarfigineqarsinnaapput. Kommuninut ataasiakkaanut immikkoortikkaanni ukiormanna kommunip ataatsip 259.000 kr.-it qinnuteqaatigisinnaavai. Tamatuma saniatigut Isumaginninnermut ministeriaqarfiup Isumaginninnikkut ineriartortitsivik SUS, nittartakkamik udsattegroenlaendere.dk-mik ingerlarsisoq, Kalaallit pillugit iliuusissaq pillugu siunersiueqatigisassatut suliakkersimavaa.
- Aningaasat taakku atorlugit qanoq allanngortitsisoqarsinnaatiginersoq takujuminaappiq, aningaasammi ilarpassui Isumaginninnikkut ilisimatusarfimmut Isumaginninnikkullu Ineriartortitsivimmut SUS-imut immikkoortinneqareersimapput. Aningaasalli suliniutinut sinneruttut amerlagisassaanngillat.
Iliuusissami suliniutinut pisortap Lise Poulsenip erseqqissaatigaa, ukiut taakku sisamat ingerlareerpata aningaasanik suli amerlanerusunik immikkoortitsisoqarnissaa pilersaarutigineqanngitsoq.
- Iliuusissap matuma siunertaata - tassalu suliniutaasut amerlisarnagit pitsanngorsarnissaat iluaqutaajumaartoq, taamaaliornikkut siunissaq eqqarsaatigalugu suleqatigiinneq pitsaanerulerniassammat. Qaqugumorsuarmut ingerlatsisoqarnissaa siunertaanngilaq. Taamaammat suliniutaasut ima pitsanngoriartiginissaat neriuutigaarput, kalaallit ikiortariallit suliniutit pioreersut iluaqutigilerlugit.
Peqatigiiffimmi Grønlandske Børnimi nuannaarnerulaarput. Allattaanerup tulliata Puk Fraibyp iliuusissaq kalaallit ikiortariallit pillugit suliniutitigut suleqatigiinnermut pitsaanerusumut iluaqutaassanasoraa.
- Ikiorniarneqartut ikitsunnguupput, aamma nuna tamakkerlugu iliuuseqartoqarpoq. Kommunit namminersortullu akornanni suleqatigiinneq katersorneqassaaq, tamannalu alloriarneruvoq, naak aningaasat pineqartut atorlugit susassaqarfimmi suliniutinik nutaanik aningaasalersuisoqarnissaa naatsorsuutiginngikkaluarlugu.
Aningaasat kommuninut immikkoortinneqarsimasut Kofoed Skolemi aamma ippigineqarput. Kalaallinulli immikkoortortaqarfimmi immikkoortoqartarfimmi pisortap Kurt Olsenip neriuutigaa iliuusissaq kommunit allat Aalborg kommunip kalaallinut immikkoortortaa isumassarsiorfigisinnaassagaat. Sulisut kalaallinik ikiortarialinnik sullissisut kommunip sulisuinik akulikitsumik naapittarput.
- Taamatut ittumik pilersitsigaanni inuiaqatigiinni danskini immikkoorlutik atasunut ajornartorsiutigineqartut tamakkerlugit takujuminarsissapput.
