Las Vegas: Kalaallinik ajoqusertoqarsimarpasinngitsoq

Mannamut ikinnerpaamik 58-it toqutaapput, ikinnerpaamillu 500-t ikilerneqarlutik.

Taakkuli akornanni kalaaleqarpasinngilaq. Kalaallit Washingtonimi aallartitaqarfiannit taama paasissutissiipput.

- Nunatsinneersunik Las Vegasimiittoqarneranik tusagaqarsimanngilagut, Kalaallit Washingtonimi aallartitaqarfianni pisortaq Inuuteq Holm Olsen oqarpoq, ilanngulluguli oqarluni aallaasersorfimmi kalaaleqarsimannginnera suli qulakkiivinneqarsimanngitsoq.

AAMMA ATUARUK Las Vegasimi saassussisoqarmat inuit 50-init amerlanerusut toqupput

Qanigisamillu aallaasersornerup nalaani Las Vegasimiittoqarsorisoqarpat, danskit Washington D.C.-mi aallartitaqarfiannut attaviginninnissamik kaammattuuteqarpoq.

- Naalagaaffeqatigiippugut, taamaattumillu qallunaat aallartitaqarfii taamatut pisoqarsimatillugu ikiuinissamut pisussaapput. Taamaammat ilaqutaasut Las Vegassimiissimasunit tusarnaariarsimasuniillu tusarfigisaqarsimanngikkunik soorunami saaffiginnissinnaapput, ernumagunik, Kalaallit aallartitaqarfianneersoq, Inuuteq Holm Olsen oqarpoq.