Kalaallimut toqutsisumut atatillugu inuit pisinnaatitaaffii immaqa unioqqutinneqarsimapput

Arnaq utoqqaq 85-inik ukiulik nukappiaqqap kalaallip, taamanikkut 15-inik ukiullip, Aalborgimi 2007-imi toquppaa. Nukappiaraq ukiuni arfineq-pingasuni taamani parnaarussassanngortinneqarpoq.
Allattoq Rune Langhoff
aggustip 29-at 2010 11:05

Nukappiararli qaammatit 16-it qaangiummata aatsaat eqqartuunneqarpoq. Sivisoqaaq, sivisuallaarujussuarluni, Inuillu pisinnaatitaaffii pillugit Strasbourgimi eqqartuussivimmi eqqartuussisut suliaq maanna misissortussanngorpaat.

Nukappiaqqammi illersuisua, Nicholas Symes, isumaqarpoq, inuttut pisinnaatitaaffiit pillugit isumaqatigiissummik Danmark unioqqutitsisimasoq.

Inuusuttummi 18-it inorlugit ukiullit qaammatini arfineq-pingasuni taamaallaat parnaarussaasinnaapput.

Nukappiaqqap sianissutsimigut misissorneqarnerata inerneri siulliit kasiilerneqarmata suliaq sivitsortoorsimavoq, tarnimikkullu napparsimasut nakorsaasa nutaamik misissuinissaat qaammatini arfinilinni utaqqineqartariaqarsimavoq.

Arnaq 85-inik ukiulik Aalborgimi 2007-imi karnevalertoqarnerata nalaani nukappiaqqap pinngitsaalillugu arneriffigeriarlugu toquppaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq