Kalaalit Nunaanni issittorujussuuvoq

DMI-lli aamma oqaluttuaraa Sikuiuitsumi sermeq aakkiartupiloortoq, ukiup ataatsip ingerlanerinnaani 25 procentimik annikillisimalluni.

Kangerlussuarmi DMI-mi silasiortoq, Lars Henriksen, oqarpoq, nalunaarutit taakku imminnut assortuutinngitsut:

-Aap, issittorujussuuvoq. Issinnerpaavoq Kitaata kujataani, tassa Qeqertarsuup Tunuaniit kujammut. Qaammataasakkut assilisaatitsinni tamanna aamma takuneqarsinnaavoq, tassami Nuuk tikillugu sikuuvoq, ukiunilu 15-ini kingullerni taamaattarsimanngilaq.

Tunumili pisarnermit issinnerunngilaq, kisianni aputilerujussuupput, soorlu Kulusummi eqqaanilu ukioq manna aperujussuarsimapput, issinnerujussuali Kitaani malunniunnerulluni.

Issinnerujussua Kitaani innuttaasut malugigaluaraat, DMI-mit ilutigalugu oqaluttuarineqarpoq, Qalasersuarmi sermeq aakkiartupiloortoq, taakkuli imminnut naapertuuttut Lars Henriksen oqarpoq.--Qalasersuarmi sermeq pillugu ilisimatuut paasisaat eqqorput, silali allanngorartuartuuvoq, ukioq mannalu tassa issittorujussuusussaasimavugut. Qalasersuarmi sermip aakkiartornera ukioq manna immaqa annikinnerussaaq, naluarpulli aappaagu qanoq issanersoq. Tassa silap kissatsikkiartorneranik oqalunneq taamaatinneqanngilaq, Lars Henriksen oqarpoq.

Suli taama issinnissaa Kitaani innuttaasut ulluni tulliuttuni suli naatsorsuutigisinnaavaat.

-Ataasinngorneq marlunngornerluunniit ilanngullugu taama issittuarallassaaq, tamatuma kingorna sila neruminnerulaalersinnaavoq.

Kitaani sikuunera pissutigalugu Nuummiit avannamut nunaqarfinnut immakkut angalaneq unitsinneqarpoq. Sikup qanoq innera qanimut malinnaaffigineqassaaq, nunaqarfinnullu immakkut angalaneq ingerlateqqinneqalissaaq pissutsit tamanna ajorunnaarsinniariarpassuk, Royal Arctic Bygdeservice tusagassiutinut allappoq.