Kalaalit Isaksen Design Københavnimi saqqummersitseqataapput
Københavnip qeqqaniippugut illorsuarujussuarmi takutitsiffiusartumi Øksne Hallenimi taaneqartartumi.
Atisalerituut, mutinik nutaanerpaanut malinnaarusuttut maaniipput. Nunarsuarmi tamani atisanik tuniniaasartut tamaanga pisiniariartorput.
Øksne Hallenimi takutitsiviit 320-it nappartinneqarsimapput. Takkunani atisat, skuut pinnersaatit nammineq sanaat saqqummersinneqarput.
Saqqummersitsivimmi 218-imi atisat nutaaliat qaqortunik qernertunik aappalaartunillu qalipaateqarnerusut saqqummersinneqarput. Atisallu nalunaaqutserneqaataannillusooq ammalortumik pinnersagaapput. Isaksen Design-ikkut saqqummersitsiviat najorparput. Ammalortoq Isaksenikkunnut ukiuni kingullerni ilisarnaataalersimasoq saqqummersitsivimmi atisani assilissanilu ersilluarpoq.Atisaliortartut panigiit Rita aamma Nickie Isaksenikkut nunatsinneersut Københavnimi atisaliortunik allanik unammillerteqarlutik namminerisaminnik atisaliorfiuteqarlutik pisiniarfiuteqarlutillu ukiut tallimat siulliit ingerlareerput. -Aningaasaqarniarneq isiginiaqqissaartuaannarsimavarput, sianigeqqissaarlugu, akissarsiakitsuaraasimavugullu, Nickie Isaksen Radioavisimut oqarpoq.
- Neriuppugut ilungersuuteqarnerput maanna imminut akililersoq. Takutitsivimmik titartaasarfimmillu Nansensgademi ungasinngitsumi ammaavugut, maannamullu ajunngitsumik ingerlavoq, Nickie Isaksen oqarpoq.
Isaksen Design, maannamut sisamanik sulisoqartut, Ilulissani, Nuummi, Danmarkimi, piffinni assigiinngitsuni Norgemi, Sverigimi, New Yorkimilu pisiniartartoqarput.