Kalaalinngorsaaneq ingerlaqqittariaqarsoraa

Partiip siulittaasuata oqalugiaataa nutaartaqanngingajattutut nalilerneqarsinnaavoq. Siumumi siulittaasussarsiornermut atatillugu oqariartuutit atorneqartut uteqqinneqarput, ukiortaamilu oqalugiaammi anguniagassatut siunniunneqartut uteqqinneqarlutik.

Ataatsimulli isigalugu kalaalinngorsaanerup pingaaruteqassusia qalleqqissarneqarpoq.

Namminersornerullutik Oqartussani ingerlatsivinnilu inuiaqatigiit pigisaanni pisortat kalaallisut oqalussinnaanissaat suli nukittorsarneqassasoq, Hans Enoksenip neriorsuutigaa.

- Meeqqerivinni sulisut kalaallisuinnaq oqalussinnaanertik pissutigalugu ilinniagaqarusukkaluarlutik ilinniakkaminnik naammassinnissinnaanngimmata akuerineqarsinnaanngilaq, naalakkersuisut siulittaasuat oqarpoq, nangipporlu:

- Sulisorpassuit kalaallisut oqalussinnaanngitsut ilinniarnissaannut pitsaasumik periarfissinneqarnissaat ammaffigalugu aaqqissuuttariaqarparput, Hans Enoksen oqarpoq.

Politikkikkut anguniagassat pillugit ulluliinerit nutaat allat taakkartorneqaraluartut, namminersornerup aappaagu Inuiattut Ullorsiornitsinni nunatsinnut eqqunneqarnissaa aalajangiusimaneqarpoq.

Tassunga atatillugu Namminersorneq pillugu Isumalioqatigiissitap suliaata februaarip qaammataata naannginnerani sapinngisamik naammassineqarnissaa anguniarneqarpoq.

Namminersornerup eqqunneqarnissaani kalaallit oqaasii pisortatigoortumik pingaarnertut inissisimalernissaat siunniunneqarpoq.

Kommunit kattussuunneqarnissaat aamma arajutsisimaneqanngilaq. Ikaarsaariarnissaq 2009-miit 2013-ip tungaanut ingerlassasoq piareersimaffigineqarpoq, ikaarsaariarnerulli 2015-ip tungaanut sivitsorneqarnissaa aamma ammaffigineqarluni.

Inunnik isumaginninnerup pitsanngorsaavigineqarnissaa naalakkersuisut siulittaasuannit aamma pingaartinneqarpoq. Inissaaleqisoqarnera taaneqarpoq, ineqarnermullu akiliutaasartut qaffakkiartuinnarnerata killilersimaarniarneqarnissaa siunniunneqarluni.

Ineqarnermut tapiissutit naleqqussarneqarnissaat ilaatigut aamma iserfigineqarpoq.