Kalaalinngorsaaneq ajunngilaq
Siumup naalakkersuinermut tunngasunut oqaaseqartartuata Lars-Emil Johansenip naalakkersuisut siulittaasuata Hans Enoksenip Namminersornerullutik Oqartussani kalaalinngorsaaniarnera tamakkiisumik tapersersorpaa, taamaattorli kalallisut oqalussinnaasunik pisortaqalernikkut maanna ingerlatsinermit akisunerusumik ingerlatsisoqartariaqarsorinngilaa.
- Akerleriinnissamut taama tunuarsimaartigisariaqanngilagut. Aqutsinermi periaaseq allanngortikkutsigu, soorunami nutaanngitsortai atorunnaassavavut. Tassaavorlu naalakkersuisut siulittaasuannut siunnersuutigerusutara, Lars-Emil Johansen oqarpoq.
Manna tikillugu Namminersornerullutik Oqartussani maanna pisortaasunik soraarsitsisoqannginnissaa taakkartorneqartarpoq. Tamatuma allaffeqarfissuarmik pisariillisaaniarnermut qanoq naapertuutsiginera arlalinnit apeqquserneqarpoq.
- Isumaqarpunga taamaaliornikkut pineqartup qimanneqarnera uggornartuusoq. Naalakkersuinikkut anguniakkat piviusunngortinniarnerini annilaangalerluta tunuartissagutta iluaqutaanavianngilaq. Naalakkersuinikkut anguniakkavut allamiut oqaasiinik oqalulluta allamut saatinniassanngilavut, Lars-Emil Johansen oqarpoq.