Kalaaliminertorusunngitsut amerliartorput
- 1993-miit maannamut misissuinitsinni paasivarput inuit peqqissusaat ilaatigut pitsanngoriarsimasoq, ilaatigullu ajorseriarsimalluni. Pitsanngoriarsimasut ilagaat inuit pujortarunnaamisimanerat, taamaakkaluartorli Kalaallit Nunaanni pujortartartut, nunat tamalaat kisitsisaataat naapertorlugit, suli amerlasoorujussuupput, Peter Bjerregaard oqarpoq.
Arnat ingasattumik pualavallaartut 1993-imi 7 procentiinnaasimagaluartut, ullumikkut 27 procentimut qaffassimapput.
Pualavallaarnerlu tamanna allatigut peqqiilliortitsilertarpoq ilaatigut uummallulersitsisarluni sukkornermilluunniit nappaateqalersitsisarluni.
Peter Bjerregaard aamma oqarpoq oqartoqarsinnaanngitsoq inuit peqqinnerulersimasut peqqiinnerulersimasulluunniit. Erseqqissaavorli kalaalimerngit nunarsuarmi nunani allani nerisarineqartunut naleqqiullugit immikkuullarissuusut, aamma nerineqarunnaassappata, taava tamanna kalaallit akornanni suli peqqiinnerulernermik kinguneqarsinnaasoq.
Kalaalimerngilli tamarmik nerineerukkiartunngitsut erseqqissaavoq tassamigooq tuttut neqaat 1993-imut naleqqiullugu nerineqarnerujussuanngorsimmammat. Tamannalu tuttut amerlisimanerannik peqquteqarsoraa.
Inuit imigassamik imernerat aammattaaq annikitsumik pitsanngoriarsimavoq, naak 1993-miit maannamut allanngortoqarpianngikkaluartoq, inuit ataasiakkaat imerunnaamisimanerat malunniussimasoq erseqqissaatigaa.
Peter Bjerregaard oqarpoq ilinniarsimanngitsut peqqinnginnermut qaninnerusartut, assersuutigalugu ilinniarsimanngitsut amerlanerit pujortartartuupput.
Akerlianik ilinniarsimasut ilinniartullu pujortannginnissap pingaassusaanik paasinnilluarsimapput, soqutiginarsinnaasumillu aamma piniartut tamatuminnga paasinnissimapput, tassa piniartut pujortartartut ikilisimagamik.
