Kalaaliminertornerulissaagut

Aalisartut piniartullu aningaasarsiorneri ilorraap tungaanut aallartinneqassappat, ullup qeqqasornermi nerisassat, minnerpaamik affaat kalaallit nerisassaannik pissuussapput, taakkulu pisortat ingerlataanni, soorlu meeqqerivinni aamma utoqqaat illuini sassaalliutigineqartassapput, Aalisarnermut Piniarnermut Nunalerinermullu Naalakkersuisoq, Ane Hansen isummersorpoq.

- Isumaliuutiga unaavoq, meeqqerivinni allanilu paaqqinnittarfinni, peqqussutaalissasoq kalaallit nerisassaataannik sassaallertoqartarnissaa, Ane Hansen oqarpoq.

Peqqussut kikkunnut tamanut atuutissaaq. Suliffeqarfinni pisortat ingerlataasa neriniartarfiini, kommunit Namminersorlutik Oqartussallu neriniartarfiini aammalu meeqqerivinni meeraaqqerivinnilu.

Taama eqqarsaasersorneq Naalakkersuisut Sermersuup Kommuneata suliffeqarnermut ataatsimiititaliaanut saqqummiutereerpaat. Taamatullu eqqarsaasersorneq soqutiginartutut isigineqartoq, Ane Hansenip oqaatigaa.

- Umimmaap tuttullu neqaanik sassaallerneruneq kikkunnut tamanut iluaqutaassaaq, aalisartut piniartullu aningaasaqarniarnerat iluaquserneqassaaq, innuttaasut peqqinnerulissapput, Ane Hansen isumaqarpoq.

- Nunat allamiut nerisassaannik nerivallaaqaagut. Ukiumut 250 million koruunit naligianut nunat allamiut nerisassaannik tikisitsisarpugut. Taakku affaannaaluunniit atorlugit maani nunatsinni piniartut aalisartullu pisaannik nerisalersuugutta peqqinnerulernerput qularutiginngilluinnarpara, Ane Hansen naggasiivoq.