Kalaalimerngit pillugit nalunaarusiaq suliarineqaleruttorpoq

Aasarisseruttorpoq, ukiumullu kalaaliminertugassanik qiterititsiviit immerlugit katersiffiuleruttorpoq.

Nalunaarut, nunatsinni innuttaasut namminneq tarajortigaannik, pujuugaannik panertuliaannillu tuniniaasinnaanermik inerteqqutaajunnaarsitsisussamut tunngasoq suli tassa naammassinngilaq. Tamanna Inuussutissarsiutinut pisortaqarfimmi inatsisilerituussaaleqinermik pissuteqarpoq, taama nersutit nakorsaanerat Lasse Holm ilisimatitsivoq:

- Nalunaarut inatsimmik allanngortitsisussaq qasukkartitsisussarlu suliaralugu ingerlapparput. Nalunaarut naammassippat kalaalimerngit nalinginnaasut tamarmik kalaalimineerniarfinni ajornaquteqanngitsumik tuniniarneqarsinnaanngussapput, tassaasinnaallutillu eqallut pujuukkat, panertut nikkut aalisakkallu, nersutit nakorsaanerat Lasse Holm oqarpoq.

Nalunaarut allanngortitsisussaq qaqugu naammassissanersoq suli nalunarnerarpaa.

- Ukiortaamit atuutilersussatut soorunami piareerusukkaluarparput, kisianni inatsisilerituunik amigaateqarpugut, taamaammat naluarput, piffissaq eqqorlugu naammassisinnaanerlutigu, sulissutigaarpulli, Lasse Holm oqarpoq.

Inuussutissarsiutinut pisortaqarfimmi inatsisilerituutut atorfik ataaseq inuttalerneqarnissamut utaqqivoq, allallu ataatsip inuttaa maanna meerartaarnermut atatillugu sulinngiffeqarpoq.

Pisat nutaat, kalaalimineerniarfinni kisimik ullumikkut tunineqarsinnaapput.