Kalaaliaraq ungagaa
Ane-Margrethe Markussen Nuup ilaani Nuutoqqamiittumi maanna kalaalimineerniarfiusumi Kalaaliaqqami sulisuusup nuutinneqarnissaa nuannarivallaanngilaa.
- Qimavinnissaa iluarivallaanngilara. Neriukkaluarpunga sivisunerusumik ammanissaa, Ane-Margrethe Markussen taama oqarpoq.
Taassuma kissaatigaa maannakkut Kalaaliaraq Nuummut pingaaruteqaqimmat illoqarfimmi eqqissisimatitanut ilannguttariaqartoq.
- Isumaqarpunga pingaaruteqartuusoq. Inuussutissarsiuutigalugu piniartut maani illoqarfimmiunut nerisassaqartitsisuaannarput. Taakkoqanngippat inuit kalaaliminertugassaqarnavianngillat. Isumaqarpunga manna qaqugorsuarmut oqaluttuarisaajuaannassasoq qanoq pileriartorsimanera qanorlu atorunnaariartornera, Ane-Margrethe Markussen oqarpoq.
Taassuma kalaalimineerniarfiup illoqarfiup qeqqanut nuutsinneqarniarnissaa iluarinngilaa isumaqarami kalaaliaqqami sulisut piniartullu kalaaliarassaq pillugu isumasiorneqarsimanngitsut.
- Nutarterisoqarnissaa ajorinngikkaluarpara. Kisianni allaffimmiuinnaallutik pilersaarusiorsimanerat taanna kinguarsaataavoq. Isumaqarpunga paasiniaaqqaartariaqarsimagaluartut maani atuisunut maanilu tuniniaasunut piniartunullu.
Kalaaliaratoqap silammut ammaannartuunera Ane-Margrethe Markussenip iluaraa. Kalaaliarartaassarli matoqqasuussaaq, tamannalu eqqarsaatigiinnarlugu Ane-Margrethep ipianngugaa.
- Tusaamasakka malillugit pisiniartalersussat amerlatsissapput, tamanna tusarlugu nuannerpoq. Kisianni tappikani sulilertussaavunga. Isumaqarpunga mikivallaartoq, eqqarsaatigiinnarlugu ipianngugisarpara tappikani sulinissara, Ane-Margrethe Markussen oqarpoq.