Kalaaliaqqat pillugit folketingimi oqallinnissaq Julianep illersorpaa
Ajornartorsiut pillugu Kalaallit Nunaata Danmarkillu akornanni oqaloqatigiittariaqarnissaanik apeqquteqaammik oqallitsitsineq pilersitsissaaq. Kalaallit Nunaanni aningaasarsiornikkut assigiinngissuseq annertooq meeqqallu kaattut pillugit ajornartorsiutip Kalaallit Nunaanni naalakkersuisut qanoq iliuuseqartariaqarnissaannik, Folketingimi oqallitsitsineq pilersitsissaaq Juliane Henningsen Inuit Ataqatigiit sinnerlugit folketingimi ilaasortaq allappoq.
Meeqqat atugaat pillugit paasissutissap ukioq 2007-imi saqqummiunneqartup assigaa. Naalagaaffiit Peqatigiit suliniaqatigiiffiata UNICEFip saqqummiussinerata kingorna naalakkersuisut aatsaat qanoq iliuuseqarnialerput, ilaqutariillu piitsuunerpaat ikiorniarlugit danskit partiivi qanoq iliuuseqarnissamik eqqarsaateqalerput, Juliane Henningsen tusagassiuutinut allakkamini taamatut allappoq.
Qulliuniarfigineqarnissatsinnik pisariaqartiitsinngilagut.
Kalaallit politikerii Danmarkimit annertunerusumik aqunneqarneratigut akisussaaffinnik piiaffigineqassanngillat, akerlianilli akisussaaffinnik tunineqassapput, ajornartorsiutillu suliaralugit, Juliane Henningsen oqarpoq.
Taamaattumik folketingimi apeqquteqaat aallaavigalugu oqallitsitsisoqarnissaq tapersersorpara Inuit Ataqatigiit sinnerlugit folketingimi ilaasortaq Juliane Henningsen oqarpoq.
