Kalaaliaqqat Danmarkiliartinneqartut pillugit qulaajaasoqalerpoq

Kalaaliaqqat 22-it danskit oqartussaasuinit 1951-imi misiligaaffigineqarnerat aallartippoq. Atuarfeqarfimmi nutaami taakku pikkorinnerpaatut atuartuutigineqartussaasimapput ilaqutaasullu akerliugaluartut Danmarkiliatinneqarsimallutik. Kalaaliaqqat namminneq oqaatsiminnik kulturiminnillu aallussiunnaarsitaasimapput amerlasuullu Nunatsinnut angerlaqqinngisaannarsimallutik.

Kalaaliaqqat qallunaanngorsarneqarnerannik misiliineq 'Misiliut'-mik taaneqarsimavoq, suliarlu tamakkiisoq ukiup ingerlanerani siusinnerusukkut KNR-ip qaqilerpaa.

Kalaallit meeqqat 1951-imi misiliutaasut nassuiaataasinnaasumik suugaluamilluunniit pissarsinikuunngisaannarlutillu utoqqatserfigineqarsimanngisaannartut maanna saqqummerpoq.

KNR-ip oqaluttuarisai aallaavigalugit, Naalakkersuisut siulittaasuata Kuupik Kleistip aamma ministeriunerup Lars Løkke Rasmussenip Misiliut eqqartorpaat, taakkulu isumaqatigiissutigaat suliaq taanna Kalaallit Nunaata Danmarkillu ataatsimoorussamik oqaluttuassartaanni pisimasuusoq alianartuusoq. Suliarli taamanili uninngasimavoq, ullorli manna pisoqalerpoq!

Ilisimatusartut suleqatigiit tassaasut, Nunatta katersugaasivia atuagaateqarfialu aamma Syddansk Universitetimi atugarissaarneq pillugu ilisimatusarnermut qullersaqarfik, Misiliut pimoorullugu qulaajarlugu misissuiffiginialerpaat, misissuinissarlu pillugu siunnersuut Naalakkersuisunut nassiussimallugu.

Misissuinissaq Naalakkersuisut siulittaasuata Kuupik Kleistip tamakkiisumik tapersersorpaa. Suliaq pillugu § 36 naapertorlugu apeqquteqaammut, Juliane Henningsenimit Inuit Ataqatigiinnersumit saqqummiussamut akissuteqaammi tamanna atuarneqarsinnaavoq.