Kalaaleq Virginiami ilinniartuusimasoq tupassimavoq

- Virginiap universitetiani ilinniartunik toqoraasoqarnera tusarlugu tupannaqaaq, taama oqarpoq virginiami universitetimi atuarsimasoq maannalu Seattle-mi najugaqartoq Naja Lund.

- Taama inuit amerlatigisut toqunneqarmata tupannarpoq, unalu pisoq siullerpaamik aatsaat taamak amerlatigisunik toqutsisoqarmat assut tupannarpoq, ingammillu pisup universitetimiinnera tupannanngitsoorani, Naja Lund oqarpoq.

Taassuma universitetimi atuartut qanoq tupassimatigisimanissaat takorloorsinnaanerarpaa.

Naja Lund oqaluttuarpoq Virginia stat-itut mikinerarneqartartoq.

- Illoqarfeeqqatut isigineqartarpoq, aammalu ajortuliorfiuneq ajortutut isigineqartarluni, Virginiamiut assut tamanna tuppatigaat, Naja Lund oqaluttuarpoq.

- Nutaarsiassani immaqa kanalit tamarmik uteqattaarpaat, oqarpoq.

Naja Lund aperaarput, nammineq takorloorsimaneraa atuartilluni inuartumik isertoqariataaraluarpat qanoq pisimasinnaanini.

- Naamik taamatut imminut eqqaanngilanga kisianni soorunami uku inuusuttuaqqat eqqugaasut naakkinaqaat, kisianni nalunartoqartaqaaq sumiluunniit ajortumik pisoqariataarsinnaavoq, Naja Lund oqarpoq.

Taannattaaq nassuiaavoq Virgianiamiikkallarami biilerlutik angalagaangamik inuit assigiinnginnerat assut malugisarsimagini.

- Ilinniagaqannginnerunerat assut malunnartarpoq allaanerujussuupput, taama oqarpoq Virginiami universitetit ilaanni maannali pineqartumiunngitsoq atuarsimasoq Naja Lund.

Taanna Virginiami 1998-imi kiisalu 2001-imiit 2003-imut universitetimi statskundskabimut atuarpoq.