Kalaaleq qangattallaaraaq
Aarsaartartoq Max Petersen juulli sioqqutilaarlugu Sydafrikami Porterville-mi unammeqataanermini normu 10-tut inissippoq. Angusalli katinneranni appasinnerusumut inissippoq.
Nunat tamalaat aarsaarnermi kattuffiata FAI-p ataani unammersuartoqarnerani tassani nunanit tamalaanit peqataasut 102-upput. Pingasoriarluni aarsaartoqarpoq siullermeernermilu Max Petersen normu 10-tut inissippoq. Tullianilli aarsaarnermi anorigissaarpallananngilaq tassani normu 42-nngorami, taamattoq pingajussaa aarsaarnermi normu 23-tut inissippoq. Angusat katinneqarmata peqataasunit 102-nit normu 24-nngorpoq.
Max Petersenip angalaqatigaa Erik Palo Jakobsen Nuummeersoq. Taanna nunani tamalaani unammeqataasarnermi Max Petersenitut misilittagaqartiginngilaq. Erik Palo Jakobsen angusat katinneranni normu 70-nngorpoq.
- Nuummi aarsaartartut nunanut allanut aarsaariartalernerat alliartuinnarpoq ”aarsaariaaserlu eqqortoq” paraglider-erfigisarlugu termik-ersorneq atorlugu taamaalillutillu isorartussutsit 50-100 km-iiterit angusinnaasarlugit, Max Petersen oqaluttuarpoq.
Taanna nunat tamalaat unammineranni pingasuni 2011-mi peqataavoq maannalu nunarsuaq tamakkerlugu kakkannerpaat allassimaffianni nomru 563-ulluni.
