Kalaaleq operamik erinarsortartoq siulleq
Kalaaleq operamik erinarsorartoq siullerpaaq juunimi tusarnaarneqarsinnaalissaaq. Nuummioq 26-nik ukiulik Ida Heinrich, Islandimi Reykjavikimi ilinniareerluni qaammatip tulliani soraarummiissaaq.
Soraarummeernerminut atatillugu Ida Heinrich Katuami juunip qulingani tusarnaartitsissaaq. Ingiortigissiavaa Islandimiu noqartilersortartoq Olafur Albertsson.
Ida Heinrichip erinarsorneq nuannarivippaa, 1993-imilu erinarsoqatigiinni NIPE-mi erinarsoqataasalerpoq kiisalu nunani avannarlerni erinarsoqatigiinni Nordisk Kvindekorimi aamma erinarsoqataasarsimalluni.
Avannaamioqatigiit arnartaasa ataatsimeersuarnerat 1994-imi Finlandimi ingerlanneqarmat, Ida Heinrichip naapippaa Islandimiu erinarsoqatigiinnik aqutsisartoq Margrét Pálmadóttir.
Taamanilu Margrét Palmadóttirip tusarsinnaalereersimavaa Ida Heinrich operamik erinarsortartutut siunissaqarluartoq.
1996-imi Ida Heinrich ilinniariartorluni Islandimut nuuppoq.
Ida Heinrich aallaqqaammut ”kiffatut” najugaqarpoq, ”arnassaminillu”erinarsornermik ilinniartinneqarpoq kiisalu operamik erinarsortartumit Björk Jonsdottirimit aamma ilinniartinneqarluni.
Ida Heinrichip neriuutigaa erinarsugassiarsuarnik soqutiginninneq nunatsinni annertunerulissasoq:
- Kalaallit Nunaat erinarsugassiarsuit tungaatigut siuariartortariaqarpoq, nunatsinnullu ingerlateqqikkusuppara, aamma nunarput Europamut ilannguttariaqarpoq nipilersugassiarsuit tungaatigut, Ida Heinrich oqarpoq.
- Nunatsinni periarfissat ammarusuppakka, inuiaqatikkalu aamma ilinniartillugit ilinniarsimasara atorlugu, Ida Heinrich oqarpoq.
Ida Heinrich erinarsoqatigiinni NIPE-mi 1993-imi erinarsoqataasalerpoq, kiisalu nunani avannarlerni erinarsoqatigiinni Nordisk Kvindekorimi aamma erinarsoqataasarsimalluni.
Islandimioq erinarsortartoq nunarsuarmi ilisimaneqarluartoq Björk Ida-p erinarsoqatigisarsimavaa.
Ida Heinrich operamik erinarsortartutut ilinniarnini nangikkusuppaa, neriuutigineqararpaalu Danmarkimi Kongelig Musikkonservatoriami ingerlaqqissinnaassalluni.
