Kalaaleq klubbimut tusaamasamut ilaasortanngorpoq

Angalatooq Ole Jørgen Hammeken Uummannameersoq New Yorkimi Explorers Clubimi ilaasortanngortinneqarpoq. Sermitsiami ippassaq saqqummersumi taama allaaserinnittoqarpoq.
januaarip 05-at 2008 16:50

Klubbi nunarsuarmi misigisassarsiortartut klubbiisa tusaamasaanersaraat, ilaasortanngortitarlu nunarsuarmi tusaamasat akornanniilerpoq, misigisassarsiortartummi tusaamasat amerlaqisut klubbimi tassani ilaasortaasarsimallutilluunniit suli ilaasortaapput.

-Uannut iluaqutaasimavoq nunarsuarmi qaqqat avannarlersaat siullersaallunga 1998-imi qaqigakku, piniartullu misilittagallit peqatigalugit nunarsuup kiatsikkiartornerata kingunerisaanik Uummannap Ilulissallu akornanni qimusserfik nutaaq sermersuakkoortoq upernaaq atuarakku, Ole Jørgen Hammeken Sermitsiamut oqarpoq.

Misigisassarsiortartut klubbiat taanna Kalaallit Nunaannut immikkut illuinnartumik attuumassuteqarpoq. Tassami Issittumut Kalaallit Nunaannullu ilisimasassarsiortut klubbip 1904-mi pilersinneqarneranut pissutaammata. Amerikamiu Robert E. Peary, avanersuarmiut Piulersuarmik taasagaat, Knud Rasmussen aamma Peter Freuchen tusaamasanut klubbip saqqummersitsiviani nuimasumik inissisimapput.

Explorers Club nunarsuarmit tamaneersunik 3.000-nik ullumikkut ilaasortaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq