Kalaaleq islandimiut piginnaanilinnik unammisitsillutik aliikkutassiaanni ingerlaqqittoq

- Nammineq erinarsuusiara kalaallisoortoq erinarsorniarpara, Thelma Kajsdóttir Lyberth kitaarilisarluni tusarnaartitsisarfimmut anillalerluni tv-qarfimmut viris.is-imut taama oqarpoq.

Thelma Kajsdóttir Lyberthip aallakaatitami peqataanera tamakkerlugu uani isiginnaarneqarsinnaavoq.

Arnaa Edda islandimiuuvoq, angutaalu Kaj Lyberth kalaaliulluni. Taamaammallu islandimiut tv-kkut aliikkutassiaannut peqataanissamut tikilluaqquneqarpoq. Erinarsuullu unammissutigisaa naliliisartunit nuannarineqarluartoq unamminissaq ullunik pingasunik sioqqutiinnarlugu taalliaallunilu erinniaavoq.

Thelma Kajsdóttirip ilisaritinneqarnermini, nutaamik misileerusulluni saqqummernissaminillu merserisaqartarnini qaangerniarsarerusullugu oqaatigaa.

Nikuillutik pattaakkaat

Erinasorlunilu aallartiinnartoq tusarnaartut alutorsaatigilereerpaat nilliasarlutik pattaattarlugulu, Thelma Kajsdóttirilu naammassimmat tusarnaartut nikuillutik pattaappaat.

- Assut nuannerpoq, ajunngeqaaq, ersarillunilu tusarnersupilussuuvoq. Peqqusiileqinaannarporluunniit, qujanarujussuaq, naliliisartoq siulleq oqarpoq.

- Oqaasissaaleqivunga. Nuanneqaatit, aamma takutitsigavit nuannaarpaluttorujussuuvutit ilakkuminartuullutillu. Erinallu - inngilitut erinaqarputit. Ajuutigiuuummeraluarpakkit, naliliisartut aappaat oqarpoq.

- Ajunngeqalunilu assut nuannerpoq, pingajuat oqarpoq.

Thelma Kajsdóttirilu imatut oqaasertalerlugu unamminerup immikkoortuata aappaanut ingerlateqqippaat: ”100 procentimik aap”, ”aamma uanga angerujussuarpunga” aamma ”nipilersortartuuvutit alutornartoq, pikkorissoq pitsaasorlu, 1000-eriarlunga angerpunga, aap. aap, aap, aap … ” affarmik kalaaleq affarmillu islandimiu aallakaatitami aqutsisup aamma alutorsaatigilluinnarpaa.

Island taamaalilluni kalaallimik piginnaanilimmik aamma peqalerpoq.