Kalaaleq ima isikkoqarpoq

Taartunik saamasunik isilik, naatsunik qernertunik nujalik. Qungujulaartoq eqii itersisimasut. Tassa kalaaleq nalinginnaasoq taama isikkoqartoq, assiliisartup danskiullunilu australiamiuusup David Troodip paasivaa.
Allattoq Najaaraq Egede
februaarip 22-at 2011 05:48

David Troodip assiliisarnermigut apeqqut una akissutissarserusussimavaa: Inuk nalinginnaasoq qanoq isikkoqarpa? Aviisi Ekstra Bradet taama allaaserinnippoq.

David Troodip Kalaallit Nunaannut tikeraarnermini illoqarfiit Nuuk, Kangerlussuaq, Sisimiut, Ilulissat, Nanortalik, Narsaq, Narsarsuaq Qaqortoq aamma Igaliku tikissimavai, taakkunanilu inuit naapitani 200-t assilisimallugit. Assit qarasaasiaq atorlugu qaleriiaarsimavai, taamaalillugu kalaaleq nalinginnaasoq qanoq isikkoqarnersoq takuneqarsinnaanngorlugu.

Nunarsuarmi innuttaasut agguaqatigiissillugu qanoq isikkoqassanersut takuniarlugu aamma Københavnimi tikeraarnermini takornarissat nunat tamalaaneersut 670-t assileriarlugit aamma qaleriiaarsimavai, taamaalillugu inuk nalinginnaasoq nunarsuarmi qanoq isikkoqarnersoq takusinnaanngortillugu.

- Inuit 10 millioniugaangata ataaseq assilivara, David Trood nassuiaavoq.

Assilisaasa inerneri Ekstra Bladet-p nittartagaani ekstrabladet.dk-mi takuneqarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq