Kalaaleq Christianiamit anisinniarpaat
Christianiami maleruaqqusat malillugit Illussaarsuarnik aamma Inissianik piginnittussaanerup aqutsisoqarfiannut arnaq Stjerneskibemi najugaqarnissaminut qinnuteqarsimanngilaq. Arnaq taanna isumaqarpoq, ataatsimoorussami najugaqarami akuersissummik qinnuteqartariaqarnani. Kisianni Illussaarsuarnik aamma Inissianik piginnittussaanerup aqutsisoqarfiata Stjerneskibet ataatsimoorussamik najugaqarfittut nalilersimanngilaa.
- Ukiuni sisamani najugaqareersoq anisissallugu ingasappallaarpoq, aammalu ataatsimoorussami najugaqannginneragaanera pissutigitinneqartoq eqqunngilaq. Arnaq anisitaaniartoq ulluinnarni kalaallinik atornerluisunik kiffartuussivoq, Namminersorlutik Oqartussanit aningaasalersugaalluni, Christianiami eqqartuussissuserisup Knud Foldschackip aviisimut Informationimut taama oqaatigaa. Pisoq tunngavigalugu eqqartuussissuserisup Illussaarsuit aamma Inissianik piginnittussaanerup aqutsisoqarfiata kalaallimik arnamik anisitsiniarnera eqqartuussisunut suliassanngortippaa.
Christiania naalagaaffillu isumaqatigiissinniarlugit, Københavnimi eqqartuussiviup nalilerpaa, illuatungeriit inatsisilerituumik eqqartuussisumilluunniit akunnermuliuttoqarlutik isumaqatigiinniassasut.
Kalaallit ineqarfiat Stjerneskibet Namminersorlutik Oqartussanit aningaasaliiffigineqarluni aaqqissuunneqarnikuuvoq.