Air Greenland: Juullimut angallanneq silap qanoq inneranit eqqorneqartoq

Air Greenland decembarip 16-anit 22-ata tungaanut ullut taamaasa angallassivoq, aamma nunatta iluani Danmarkimullu ilaasut 1000-it sinneqartut ullormut angallanneqartarput, Angalasullu amerlanerit juullisioriartuusut Air Greenland nalunaarpoq.

Decembarip 23-ani angallassisoqannginnissaa pilersaarutaavoq - kinguaattoortoqarnissaanulli piareersimasoqassasoq, Air Greenland nalunaaruteqarpoq. Juullisioriartullu apuunnissaat sillimaffigineqarluni. 

Silap allanngorarnissaa ilisimaarutigineqarpoq silalu pissutigalugu timmisartuussinissat ilaannut sunniuteqareerluni.

Ilaasut ippassaq Nuummukartussat ullumi apuunneqareerput, taamaattoq ippassaq Danmarkimit Narsarsuarmukartussat suli apuutinngitsut Air Greenlandimeersup, Katrine Hjelholt Nathanielsenip nalunaarutigaa.

Anorersuaq ingerlaartoq kujataanukaartoq

Kujataani anorersuaq anngukkiartorpoq - anorlerneralu sakkortusiartulereerluni, taamaattumik angallannermut tamanna aamma sunniuteqarsinnaavoq.

Tamatuma saniatigut ippassaq Nuummit Narsarsuarmukartussat timmisartup Dash 8-p teknikkernera pissutigalugu apuutinngitsoorput. 

- Timmisartoq ullaaq manna piareersimatinneqaraluarpoq - Airbussilu ullumikkut kinguaattuussaaq ilaasussat utaqqineqassammata, Katrine Hjelholt Nathanielsen KNR-mut allappoq.

Ullunili tulliuttuni silap qanoq innissaa Air Greenlandimit malinnaaffigeqqissaarneqassaaq, pilersaarutaasullu malillugit decembarip 23-anni angallassisoqassanngilaq, taamaattoq decembarip 22-ani angalasussat apuutinngitsuussagaluarpata timmsisartoq sillimatinneqassaaq.