AWG2016 Suleqataasussat takkutinngitsoortarnerat suli ajornartorsiutaasoq
Kajumissutsiminnik suleqataasut aqutsisoqarfianni ulapputtunnguaqarpoq, kajumissutsiminnik suleqataasussanik amigaateqartoqartillugu taartaasussanik pissarsiniarnissamut Hotlinemik pilersitsisoqarsimalluni.
Nina Tuxen kajumissutsiminnillu suleqataasut allat pingasut oqarasuaatinik tassani paarsisuupput, ilaatigullu Illorsuaq Timersortarfimmi arnanik sillimaniarnermi suleqataasussanik pissarsiorput.
Hotlinemiittut ilagaat Karl-Pavia Berthelsen, taanna akunnerni sisamani sulinermini 100-nit sianerfigineqarsimavoq:
- Ilaatigut suleqatigiinni aqutsisut suleqataasussanik amigaateqarlutik sianertarput.
Aamma atuaruk AWG2016-imi kajumissutsiminnik suleqataarusuttut imaaginnavittut
- Hotline ullaakkut arfinernut ammartarpoq unnukkullu qulit tungaanut ammasarluni, AWG2016-imi pisortamut tullersortaasoq Arnakkuluk Jo Kleist taama oqarpoq.
Kajumissutsiminnik suleqataasussat 22-t takkutinngitsoortut
Kajumissutsiminnik suleqataasussat takkutinngitsoortarnerat suli ajornartorsiutaasoq.
Kajumissutsiminnik suleqataasut takkutinngitsoortarnerat suli ajornartorsiutigineqarpoq. Qassimi sulisussanit 27-usunit tallimaannat ullaaq takkussimasut, radioaviisi ilisimatinneqarpoq.
- Ullaaralaakkut nalunaaqutaq tallimanut sulilersussanik amigaateqartarpugut. Aammali ikiortissarsiorluta sianerfigisaqaraangatta ikiuukkumasorpassuusarput, Arnakkuluk Jo Kleist oqarpoq.
Kajumissutsiminnik suleqataasunit siniffissanik katiterisussanit 20-iusunit arfineq-marluinnaat takkussimasut tallimanngormat tusarliunneqarpoq. Taamatullu pisoqarneratigut qassit takkunnerinik, qassillu takkutinngitsoornerinik Arctic Winter Games ullormoortumik nalunaarsuisalerpoq, Arctic Winter Gamesimi pisortaq, Maliina Abelsen, taama oqarpoq:
- Siniffinnik katiterisussat ilaasa takkutinngitsoorsimanerat paasigatsigu ullut tamaasa nalunaarsuisalerniarluta aalajangerpugut, taamaaliornikkut qassit takkussimanersut nakkutigilluarsinnaajumallugu, Maliina Abelsen oqarpoq.
Kisitsisitigut paasissutissanik suliaqartoqassanngikkallarpoq
Timmisartuussinerilli arlallit kinguaattoorfiuneri pissutigalugit kisitsisitigut paasissutissanik suliaqartoqarsinnaasimanngitsoq, Arnakkuluk Jo Kleistip oqaatigaa:
- Kajumissutsiminnik suleqataasussat taartissaannik pissarsiorluni sianeqattaajutigaluni kisitsisitigut paasissutissanik suliaqarnissaq ajornaatsuinnaanngilaq. Taamaammat nalunaarsuineq unitsikkallarparput, Arnakkuluk Jo Kleist oqarpoq.
Unammiat silarlunnera pissutigalugu tikinnissaasa kinguaattoornerat kajumissutsiminnik suleqataasut tuusintit arlaqartut piffissap qanoq-ilinerani sulinissaannik nikititerisoqartariaqarsimavoq.
Tele-Postillu oqarasuaatinik angallattakkanut attaveqaataasa sapaatiummat unnukkut kipisaqattaalernerat kajumissutsiminnik suleqataasut sulinissaannut pilersaarutit inissinniarnissaannik aamma ajornakusoortitsisimavoq, oqarasuaatinimmi angallattakkanik atuisut sms-inik tigusisinnaanatillu sianerfigineqarsinnaasimanngimmata.
