Kajumissutsimik sulisoqarneq nukittorsarneqassaaq

Nittartakkami  timersornermut unammiuaartitsinermullu aaqqissuunneqartut sorliit namminneq kajumissutsimik sulisussanik amigaateqarnersut takuneqarsinnaavoq.

Nittartagarlu aqqutigalugu kajumissutsimik sulisussanik pissarsisoqarsinnaasoq, Kommuneqarfik Sermersooq oqarpoq.

 - Nalunngilarput peqatigiiffinnut unamminarnerpaajusartoq nammineq kajumissuseqarluni suliaqarsinnaasunik ikiuussinnaasunillu pissarsiniarneq, Kommuneqarfik Sermersuumi sunngiffilerinermi siunnersorti, Lars Jørgen Petersen, oqarpoq.

Utoqqaat asiarsimaarnissaannut, Nuummi atoqqitassaarniarfimmi, Nuuk Marathonimut, aqqusinikkullu sisoraatinikujakkaarluni rulleskerluni nunatsinni pissartanngorniunnissamut unamminnermi kajumissutsiminnik ikiuuttussarsiortoqarpoq.

Aamma kulturikkut isumaginninnikkullu aaqqissuussisoqartillugu kajumissutsiminnik sulisussarsiortoqarsinnaasarpoq.

Pisussat sumi, qaqugulu pissanersut, qanorlu namminneq kajumissutsimik suleqataasussatut allatsissinnaanerluni, kommunip nittartagartaartaani atuarneqarsinnaavoq.

Kajumissutsimik sulineq nittartagaq aqqutigalugu nukittorsarneqassasoq, Kommuneqarfik Sermersooq oqarpoq.

- Sutigut tamatigut kajumissutsimik suliaqartut soorlu assersuutigalugit peqatigiiffiuppata suliniuteqarpataluunniit, tassani sinaakkutit pitsanngorsaavigeqataarusullutigit taamatut suliniuteqarpugut, Lars Jørgen Petersen oqarpoq.