Jens Napaattuup naalakkersuisuunermi nalaani ilassinnissutissanik aningaasanik atornerluisimaneranut Namminersornerullutik Oqartussani pisortaaneq Kaj Kleist nakkutilliilluarsimanngilaq. Ilassinnissutinik atornerluisimanermut akisussaanerpaanini naalakkersuisut siulittaasuata Hans Enoksen-ip nassuerutigaa. Pisut qinersisitsisoqarnissaanik kinguneqassanngillat allaffissornikkulli sukannersumik ingerlatsinermik kinguneqassasut Hans Enoksen oqarpoq:
- Nakkutilliineq naalakkersuisoqarfiit namminneq iluminni annertuumik ingerlattarpaat. Kisianni uani uggornarpoq, nakkutilliinerup taama qarsupitsigisumik ingerlanneqarsimanera.
Tamanna pillugu naalakkersuisut siulittaasuata sulisuni ippassaq sakkortuumik piumaffigisimanerarpai piaarnerpaamik aaqqissueqqullugit.
- Siunissami taama pakasarneqaqqinnissarput pinngitsoorneqarsinnaanngortinniarlugu, Hans Enoksen oqarpoq.
Kaj Kleistip piffissaagallartillugu jens Napaattuup atuipilunneranut maluginiaasimannginnera kinguneqarpoq.
- Sippuisimanerit annertuumik kinguneqassapput, tassa pisortaaneq piumaffigineqarpoq sukannersumik aqutsineq piaarnerpaamik aallartissagaa.
Naalkkersuisut siulittasuattut pisumut akisussaaqataanini Hans Enoksen-ip isertunngilaa.
- Akisussaaqataavunga, taanna miserratiginagu oqaatigissavara. Allaffeqarfipput sukannersumik aqutsisimasariaqaraluarpoq, naalakkersuisoqarfinnut pisortaqarfinnullu tatiginninneq angivallaarsimavoq. Tatiginnikkaluaruttaluunniit aamma qulakkeertariaqarparput atugassagut malillugit ingerlasoqarnersoq, tamannalu qulakkeertikkusuppara siunissami taama pisoqaqqeqqunagu, Hans Enoksen oqarpoq.