Kaattut FN-ip nerisassaaleqissuppai
Naalagaaffiit Peqatigiit inuussutissaqartitsiniarnermut immikkoortortaqarfia WEP aningaasassaaleqivoq, nunarpassuit ikiuiniarlutik neriorsuutitik eqquutsissimanngimmatigit.
FN-ip kaattunut ikiuutini 16 milliardi koruuninik ikilisittariaqartarsimavai, piitsuunerpaanik eqquisumik.
- Inuussutissat tunniussinnaasavut ikilisartariaqarpagut, sanngiinnerpaanik allaat eqquisariaqarumaarluta, ikiuiniaqatigiiffiup pisortaa Josette Sheeran oqarpoq.
Naalagaafffiit sorliit neriorsuutiminnik eqquutsitsinngitsoorsimanersut oqaatigerusunngilaa, tamanit ilisimaneqareermat aningaasaqarnikkut nunarsuarmi ajornartorsiortoqartoq, nunarpassuit naammattusaarinerusariaqarnerannik kinguneqartumik.