Kaattunut igaffik matuvoq
Nunavut illoqarfiisa pingaarnersaanni, Iqalunni, igaffik, inunnut kaattunut akeqanngitsumik nerisitsisartoq, matuinnartariaqarsimavoq, 31.000 koruunit sinnerlugit akiligassaqalernini pissutigalugu.
Igaffik kaattunut akeqanngitsumik nerisitsiffiusartoq matuinnartariaqarpoq, naak pisortanit 306.000 koruunit sinnerlugit aningaasaliiffigineqarsimagaluarluni, Nunatsiaq News taama allaaserinnippoq.
Igaffimmut aningaasaliissutaasut qanoq ililluni pissarsiariniarnissaat ajornartorsiutaavoq, igaffimmullu aningaasaliissutit taama anngunniaasaartarnerat siullermiilinngitsoq, igaffimmi nerisitsinermi ikiortaasartoq palasi John Tyrell, Nunatsiaq Newsimut oqarpoq.
- Kaattut amerlanerulissapput, tamannalu qinnuloortut tilliarniartartullu amerlinerannik kinguneqanngitsoornavianngilaq. Igaffilli matuppat tamanna inuit piitsuunerpaat peqqissusaannut kinguneqapilussaaq, taamaattumillu aningaasat kinguaattooratik takkunnissaat pisariaqarluinnarpoq, John Tyrell, Nunatsiaq Newsimi taama issuarneqarpoq.
